Cu regularidad Ministernan y Parlamentarionan di e partidonan MEP y RAIZ , formando y apoyando e Gobierno di Aruba, ta vocifera den direccion di pueblo cu mester di UNION y mester traha HUNTO pa NOS ( = MEP y RAIZ ) por logra NOS ( = MEP y RAIZ) cosnan.
Den realidad MEP y RAIZ ta confirma na pueblo cu na Aruba NO por traha HUNTO y no tin UNION pa logra cosnan bon pa ARUBA.
E realidad na Aruba ta cu cada Minister kier ta un Gobierno riba su mes , pa su mes ( y su F&F ) y cada Parlamentario kier ta nada mas cu un “cheerleader”( manera nan ta yama otro ) pa su partido so y no kier funciona manera mester ta , esta “un controlado di Gobierno” !
Como ciudadano/ votado , cada bes cu mi tende/lesa e yoramento aki di “union y hunto” , mi ta puntra mi mes : ta kico nan kier men ?
Nan ta sordo/ciego cu nan no ta tende ni lesa con e representantenan di MEP y AVP y nan fanaticonan ciego ta acusa , menasa , ofende otro publicamente sin prueba ?
Wel , MEP y sigur AVP tambe , e origen y e motibo cu na Aruba políticamente no tin UNION y cu políticamente no por traha HUNTO ta pasobra boso a venena e mente di pueblo cu e manera cu boso ta trata otro publicamente.
E hecho cu boso no a demostra pueblo e UNION cu Aruba mester pa HUNTO forma y apoya un Gobierno nacional , ta demostra/proba cu boso actual palabranan di UNION y di HUNTO ta nada mas cu un forma pa soborna pueblo votado.
Den e situacion cu Aruba ta actualmente financieramente , un Gobierno nacional apoya di forma positivo pero critico pa tur partido den Parlamento , por duna Aruba e sintimento di UNION y HUNTO bek cu Aruba a demostra den pasado y cu Aruba tin mester di dje awor aki.
Nunca ta laat pa reconsidera y cuminsa delibera pa logra un Gobierno nacional pa asina demostra e “UNION y HUNTO” cu Aruba tanto mester pa logra e cosnan bon pa henter Aruba !
Ken ta dal e prome stap ? Gobernador ?
Skirbi pa Robert S Arends , ciudadano.
