Durante reunion publico di Parlamento di Aruba cu a cuminsa diaranson ultimo a trata e prome dia di presupuesto 2022 hunto cu Minister di Husticia y Asuntonan Social y Minister di Labor, Energia y Integracion.
Molina kende ta presidi Comision Fiho di Husticia den Parlamento a enfoca mas riba dicho veld, primordialmente Cuerpo Policial Aruba. Mirando e echo cu financieramente no tin hopi posibilidad pa cumpra material, Molina a expresa cu mester enfoca mas riba nos hendenan, cu actualmente ta cargando siguridad na Aruba.
Mester inverti den nan educacion y nan ‘rechtspositie’ cu ta pertenece cu e funcion cu nan ta eherciendo. Pa cu esey Molina a presenta un mocion pe personal di e ‘middenkader’ unda ta urgi Minister di Husticia y Asuntonan Social pa duna e atencion necesario pa optimalisa e ‘bedrijfsvoering’ pa cu e personal di Cuerpo Policial Aruba y presenta riba un corto plaso un solucion caminda ta percura pa ambtenaarnan cu pa añanan largo a eherce funcionnan di liderazgo, a duna guia y sosten.
Como tambe percura pe organisacion por a sigui funciona debidamente e balorisacion y compensacion necesario cu nan tin derecho riba dje, cual por encera entre otro gratificacion, ‘waarnemerstoelage’ y / of ahustacion di e condicionnan pa ‘bevordering’ of alocacion den nan funcion.
E di dos mocion cu parlamentario Molina a presenta ta en conexion cu e siguridad di trafico na Aruba unda ta urgi Gobierno pa organisa un campaña di conscientisacion riba e uso corecto di ‘vierbaanswegen’ y rotonde. Como tambe pa haci un investigacion, mirando e desaroyonan di nos careteranan, si un adaptacion di e velocidad maximo riba cierto caminda ta factibel.
Finalisando Molina ta gradici e Mandatario di Husticia cu den su contestacion na su preguntanan ya caba a tuma e paso pa cu e mocionnan; pa inverti den polis di bario y tambe pa organisa e accion pa entrega arma. Como tambe a pidi e Mandatario di Husticia pa tin e boluntad pa coopera, colabora, comunica mas tanto posibel cu e comision. Y asina intercambia ideanan y dialoga cu e meta pa mehora siguridad na Aruba.
