E bunitesa di ta miembro di Women’s Club of Aruba (WCA) ta, di yuda crea un miho comunidad door di nos proyectonan y di haci trabou di boluntario. Door di ta miembro di nos club, nos ta comparti nos experiencianan cu otro y familiarnan. Esaki ta un refleho tambe di famia Geerman.
Prome generacion: mama, Maria Geerman
Pa 44 aña nos Life Member, Maria Geerman, ta miembro di WCA. Na 1978 el a wordo introduci door di Bea Kock, Greta Geerman y Aida Briezen. E tempo ey, e tabata tin 27 aña y a bira miembro di directiva como chairman di comision di Welfare (Bienestar). El a continua den e comision pa mas of menos diesun aña, dedicando su tempo na hunga bingo y entreteniendo nos grandinan durante ocasionnan special. Maria a duna di conoce cu esaki ta trece recuerdonan bunita p’e cu e no por lubida. Den e tempo ey, ainda e comision no tabata tin su propio presupuesto y e miembronan di e comision mes tabata traha snacks y bolo p’e eventonan cu nan tabata organisa pa nos grandinan. Masha tristo nos miembro Maria ta bira, ora un di e grandinan den e casnan di anciano fayece. Cu tempo e tabata siña conoce nan, tabata aprecia y stima nan y ta tristo pa tende cu ya nan no ta cu nos mas. Fuera di esey, Maria tabata miembro tambe di e comision di Student Awards.
Di dos generacion: yiu, Angèle Geerman
Ya pa cuatro aña Angèle ta miembro di WCA y a sigui den e mesun pasonan cu su mama y a join directiva como chairman di Welfare y awo e ta nos chairman di comision di Program. Pa añanan largo el a experiencia tur locual su mama tabata haci como boluntario. Esaki a dun’e curashi pa aplica pa bira miembro. E ta corda cu di chikito e tabata yuda su mama door di busca producto cerca su bisiñanan, kendenan tambe tabata yuda cu donacion pa e actividadnan. Maria ta bon conoci pa su arte culinario y ta mas cu claro cu Angèle ta gusta yud’e den cushina.
Di tres generacion: nieta, Rishella Geerman
Luna pasa, durante nos reunion di miembrecia, Rishella a wordo instala como miembro di WCA y a uni su mes cu su mama Angèle, den e comision di Welfare. E tabata ansioso pa bira miembro, door di a experiencia e amor y alegria cu tanto su mama como su wela tabata comparti cu otronan durante nan trabou di boluntario.
Tres generacion a join WCA pa bienestar di comunidad, enfocando riba e importancia di nos lema: “Not what we give, but what we share”.
