Tip 1. Proteccion contra solo y calor:
• Entre 10’ or di mainta y 4’ or di atardi tene bo yiu for di solo directo.
• Hunta bo yiu su curpa regular cu proteccion contra solo di 30-50 SPF.
• Anke cu bo yiu no tin sed lag’e bebe awa regularmente; tene na cuenta cu softdrink cu ta contene cafeina ta deshidrata su curpa.
• Pone atencion pa bo yiu no haya un ataca di calor (zonnesteek, heatstroke). Si e haya e.o. keintura halto of cai flauw, pon’e den un lugar fresco y busca atencion profesional di biaha.
• Bisti bo yiu un shirt, bril y un petchi of sombre ora e ta hunga den solo.
• Bisti bo yiu algo na su pia pa proteh’e contra santo cayente of obheto skerpi.
• Evita pa bo yiu cana cu pamper muha y yen di santo; esei por causa feilamento
• Fresca bo yiu su curpa cu awa limpi despues di landa of hunga den santo
Tip 2. Seguridad banda y den awa:
• Un mucha mester di supervision constante di adulto ora cu e ta den of serca di laman of pool; hasta si e sa landa caba of e tin un jacket flotante bisti.
• Check di antemano unda e post di Rode Kruis y oficina di strandpolitie ta.
• Siña bo yiu con e mester comporta su mes banda di awa pa evita acidente, e.o. no pusha hende den awa of core rond di pool.
• Siña bo yiu para cara pa awa ora e ta den of e ta cerca di awa; asina e por wak ora un ola grandi bin pa evita cu e ola por tumb’e di sorpresa.
• Si tin un area designa (p.e. cu boei) pa landa splica bo yiu e motibo pa esaki y pa e no bai pafor di e area.
• Preferibel no hiba co’i hunga flotante of cu biento por hiba lihe, pa evita cu e mucha ta bai su tras den awa ora biento bul’e.
Tip 3. Seguridad rond di e campamento:
• Si e campamento ta cerca di unda trafico ta pasa pone regla te unda e muchanan por bai y pone supervision di adulto pa evita cu mucha ta subi caminda.
• No laga mucha sera den auto, e calor por haci’e hopi malo.
• Pa evita cu bo yiu ta perde, siñ’e bisa su nomber, esun di boso y e number di bo celular. Pa mas sigur bisti’e un polsband cu e informacion aki.
• Purba mantene bo yiu su habito di drumi y come.
• Hiba wega, co’i hunga y buki pa entretene bo yiu.
• Nunca laga bo yiu bai toilet publico su so.
• Mantene bon higiena: hiba awa, habon y serbete pa laba man y baña bo yiu.
• Warda tur producto of material cu por haci un mucha daño na un lugar safe.
• Pone bon atencion cu e cuminda ta bon warda den ijs y cu e ta bon cushina. Promer cu usa cuchiu, forki, etc corda laba nan tur debidamente.
• Hiba suficiente awa pa bebe.
• Como mayor tene bo consumo alcoholico na un minimo p’asina bo por dedica tempo y atencion adecua na bo yiu.
• Duna bo yiu un bon ehempel: ruim op tur cos hunto y tira sushi na e lugar indica.
Pasa dianan placentero di Siman Santo den union y trankilidad familiar.
Articulo traha pa Fundacion Pa Nos Muchanan.
Pa informacion of pregunta por acerca Fundacion Pa Nos Muchanan – Cumana 2
Tel: 5834247/5880856 – Whatsapp: 6998900
E-mail: info@fpnm.aw – Website: www.fpnm.aw
