Diasabra 23 di april, Arubox a pre-celebra Dia di Rey cu un torneo grandi, cu atletanan local y for di nos hermana isla Corsou. Tabatin 13 bouts, incluyendo algun exhibicion pa nos muchanan haya nan prome experencia den un ring official.
E prome pelea di exhibicion tabata den categoria ‘Kids/Boys’: den skina cora, Pharris Pilier, edad di 11 aña di Milliard Boxing Academy, Aruba contra Shermilon Susana, 10 aña di edad di Supreme Boxing Center di Corsou. Nan a bringa 2 rounds di 1.5 min.
Despues a sigui den categoria Junior Light Welterweight (60-63.5 kg), Jeandru Castañeda (Milliard Boxing Academy) cu un record 0-1 a bringa contra den skina blauw, Zeshawn Perez (Pariba Boxing Gym), y a gan’e pa decision unanime.
E di tres bout tabata den division hubenil Welterweight (63.5-67 kg) den skina cora Ryshendrick Mongen di Boca Boxing Club, Corsou cu un record 0-2 vs Tristan Romero di Milliard Boxing Academy, Aruba, su record 1-0, a bay contra otro den 3 rounds x 3min, unda e ultimo a gana pa decision unanime.
A sigui den mesun categoria di hubenil (17-18 aña) , for di Supreme Boxing Center di Corsou Raychendell Bakkoord, contra Brandon Rhoden di Byerlite Boxing Club, Aruba den skina blauw, y pa ambos tabata nan prome pelea. A bringa 3 rounds di 3 min, unda skina cora, di Corsou, a gana den un split decision.
E ultimo pelea den categoria hubenil tabata entre Jeandrick Croes di Milliard Boxing Academy, den skina cora contra e atleta di Pariba Boxing Gym, Kieyon Henriquez. Esaki tabata Jeandrick su prome pelea y e di dos pelea di Kieyon. E pelea aki a wordo para pa e entrenador di skina blauw den di dos round, unda cu Jeandrick Croes a gana pa TKO.
Despues Jude de Windt di Leo’s Boxing Gym, den skina cora cu un record di 0-1 a bay contra Ethan Nagtegaal Gomez (Byerlite Boxing Club) cu cero pelea bringa, den peso 60-63.5 kg, categoria Elite (19-40 aña). Den prome round, dokter a stop e contest (DSC) y skina blauw a gana.
Durante e break, e hoben VG Ras a deleita e publico cu su cantica “Vudu”.
E programa a sigui cu un exihibicion, entre 2 hoben femenino; Christine Francisca di Supreme Boxing Center Corsou (15 aña) den skina cora a enfrenta Maureen Werleman di Stay Thai Fit/A+ Performance (11 aña) den skina blauw, pa 1 round di 1.5 min, pero cu permiso di ambos entrenador, e dos damas a bay un round mas.
E ultimo exhibicion tabata entre Derrick Mathew di Pariba Boxing Gym (record: 0) den skina cora y Enrique de Cuba di Stay Thai Fit/A+ Performance (1-1), pa 3 rounds di 3 min, den peso Cruiserweight (80-86 kg).
Den categoria di Super Heavy (92+ kg), Davyck Franken di Byerlite Boxing Club a enfrenta Antwan Ignacio di Jefferson Boxing Gym den skina blauw. Ignacio a gana su pelea cu un TKO den di 2 round.
Dijon Inesia (Leo’s Boxing Gym, 1-0) a bringa contra Quincy Pequero di Jefferson Boxing Gym (1-0), skina blauw den Light Middleweight (67-71 kg), division Elite y e resultado tabata unanime pa skina cora.
Un otro pelea den Light Middle, tabata entre Ricky Hernandez (1-0) cu ta den seleccion di Aruba contra e pugil di Corsou di Supreme Boxing Center, Fabian Willems (0-1), unda Hernandez a gana su pelea cu un split decision.
E penultimo pelea, den skina cora Shaquon Croes (seleccion nacional, 1-0) a enfrenta Jayron Trimon di Stay Thai Fit/A+ Performance (2-1), den categoria Middle weigth (71-75 kg), y skina cora a gana cu un decision unanime.
E ultimo pelea riba programa di Arubox tabata entre Damian Pinas (0-0) di Aruba y Dwinley Mathilda di Corsou (2-4) den Light Heavyweight, unda cu Referee a Stop e Contest (RSC) den tercer round. Ganador tabata Dwinley Mathilda di Corsou.
Aruba Boxing Association por wak atras cu un otro evento boxistico masha exitoso, unda famia y fanaticonan a bin apoya nan atleta favorito. Ministro di Enseñansa y Deporte tambe tabata presente, apoyando su yui homber, Jeandrick Croes cu a debuta e anochi ey.
Arubox ta gradici tur esun cu a yuda, den un of otro manera, pa engradece nos deporte amateur, Open Boxing. Nos ta yama danki na tur e atletanan, hunto cu nan gym/club y entrenadornan, nos oficialnan, y dokter Jimenez, cu a haci e anochi aki uno exitoso. Un danki tambe na Curacao Boxing Association pa acepta nos invitacion, unda cu por a presenta peleanan internacional hunto cu e peleanan local.
Potretnan courtesia di: Akil Koolman, Judienne Celaire y 297Sports
