Un feliz dia bendiciona y cu Dios brasa boso cu Su amor paternal.
“Ami ta e pan cu ta duna bida! “(Huan 6, 48 )
Pan ta lo basico Y na mes tempo lo esencial pa fortifica nos curpa fisico. Hesus ta usa e simbolo di pan, pa mustra cu Su curpa (e Pan bibo) ta lo esencial pa fortifica nos curpa spiritual. Hesus ta laga Su mes curpa pa nos den Eucaristia. Si pan traha pa man di hende ta duna forsa, anto cuanto mas fortalesa curpa di Esun cu a baha for di shelo ta duna ? Durante cada celebracion di Santo Sacrificio di Misa, Curpa y Sanger di Cristo ta presente pa salbacion di nos tur. Pan y biña ta forsa di unidad den Iglesia, di unidad entre rumannan, yiunan di Dios, entre nos tur, pasobra Hesus ta bibo den Pan y Biña. E ta haci nos realisa cu nos ta responsabel pa esnan mas debil, mas chikito y mas pober, cu ta warda riba un tiki atencion cu nos mester solidarisa cu nan, den nan speransa.
Oracion: Oh Hesus, siña mi descubri Bo den Santa Eucaristia, caminda Bo a haci sacrificio di Bo mes pa ami tin Bida Eterno. Instrui mi, guia mi, pa mi por ricibi Bo semper dignamente. Laga cu pa medio di Santa Eucaristia, mi por imita Bo. Danki Señor Hesus. Amen.
