Un Arubiano di Savaneta…
Di Aruba, Curacao, Sint Maarten, Bonaire, Saba y St. Eustatius
E siman aki, Aruba por ta orguyoso di un yiu di tera cu a logra un funccion prominente dentre di Reino Hulandes, esta presidente di Corte Comun di tur e islanan Hulandes den Caribe.
mr. de Kort den su discurso na su instalacion a usa e palabranan cu Reina Juliana a usa na momento di a subi trono di Reino Hulandes, 6 di september 1948: “Ken mi ta, cu mi mag di hasi e cos aki?”. Cu esaki, mr. de Kort a pasa riba su bida na Aruba, caminda el’a nase y crese te na momento cu el’a bay studia na Hulanda.
E’a repasa henter su hubentud na Aruba y Hulanda, y a splica cu el’a wordo lanta dor di su mama, pasobra cu su 4 aña, su tata a fayece.
Un mama cu mester a haci dos trabao, pa asina por a paga pa su educacion. El’a conta cu el’a haya un bon educacion y guia. Como presidente di corte comun, e mester ta un ehempel.
“Mi kier ta un ehempel pa tur e mucha muher y mucha hombernan cu ta aworaki na scolnan riba nos islanan. No ta importa for di cua bario bo ta bin, hasi algo, hasi bo best na scol y pa tin un bon formacion.
Pa e mama y tatanan, opa y oma nan, tanta y tionan, esnan cu tin “voogdij”, y cu tin biaha ta sinti cu e edukacion ta un reto: mima bosnan yui, protehanan, y stimulanan na scol. Un dia nan lo hasi bo orguyoso”, tabata palabranan di mr. de Kort.
Estando den abogasia na Curacao y na Aruba, su interes pa bira hues a lanta. El’a papia di esaki cu defuntu mr. Luis de Lannoy, kende e tempo ey tabata presidente di Corte Comun. Mr. de Lannoy a konseha de Kort pa amplia su base y tambe p’e bay traha un tempo na Isla Riba. E consehonan ey el’a sigui, caminda el’a traha 3 aña como abogado na St. Maarten. Asina el’a start cu su estudio pa hues te cu el’a keda nombra como miembro di Corte Comun.
Den varios fase el’a traha na Curacao, Bonaire, Aruba, St. Maarten, Statia i Saba.
E hecho cu el’a traha riba e seis islanan di “Antias Hulandes” a lag’e sinti kico ta e diferencia di cada isla, nan identidad, nan propio idioma y cultura. Cu tempo of por ehempel dor di influensia externo, cultura por cambia of culturanan por influensia otro.
Ora norma y balor di un comunidat cambia, ta na hues pa busca husticia y forma husticia. Pues e hues mester tin bon inculca na loke ta balor y opinion cu tin den comunidad, pasobra cultura y opinion riba cada isla ta diferente, ta responsabilidad di Corte Comun pa mara y conecta hurisdiccion riba e seis islanan cu otro.
Como presidente nobo di Corte Comun e tin algun meta pa logra cual ta: sigui ancra Corte Comun den cuadro internacional; contina cu e colaboracion cu Hoge Raad, Raad van State, Centrale Raad van Beroep y SSR, den un perspectiva inter-regional cu ta di gran balor pa Corte Comun; partisipa den e netwerk nan menciona y colabora cu e organisacionnan aki cu e meta pa reforsa nan trabao na calidad di e trabao na beneficio di comunidad cu ta sirbi; focus riba e proseso primario, cual ta e trabou di un hues; pa salbaguardia calidad di trabou y proseso, e sosten na gobiernonan y parlamento di nos islanan ta indispensabel.
Finalmente lo pone atencion na alohamiento di nan establesimentonan riba e islanan.
SOLO DI PUEBLO y TOP 95 FM ta extende palabra di pabien na hues mr. De Kort, un persona naci na Aruba, di Savaneta, cu a lucha den su trajecto di bida pa asina por logra un di e funcionnan di mas clave di husticia den Caribe Hulandes.
