Dialuna durante Conferencia di Prensa di Gobierno di Aruba, Prome Minister Evelyn Wever – Croes a duna update di e situacion di COVID-19. A constata cu e cifranan di casonan positivo ta aumentando, pa cual ta necesario pa ciudadanonan practica medidanan di cuido y prevencion contra e virus.
Siman pasa tabatin 326 caso activo di Covid, y e siman aki e casonan ta na 701. Pues den solamente un siman, e cifranan a mas cu redobla. Basa riba esaki por constata cu actualemente e averahe di casonan nobo pa dia ta 134, y e ‘positivity rate’ ta 43%. Pa locual ta e cantidad di personanan den hospital, siman pasa tabatin 4 persona hospitalisa y actualmente tin 10 di cual 1 ta den cuido intensivo. E cantidad di personan cu a fayece di Covid tambe a aumenta cu 3 mas, cual ta haci e cifra total di esnan cu a fayece di covid, 216. Prome Minister den nomber di Gobierno ta extende palabra di condolencia na famianan y sernan keri di e fayecidonan.
Teniendo na cuenta cu tin solamente 1 persona den cuido intensivo, no tin base legal pa impone medidanan di ley pa controla y reduci contagio. Pa e motibo aki, Prome Minister ta pidi henter comunidad pa cuida bo mes y cuida bo famia. No warda pa Gobierno bin cu medida pa cuidabo.
E datonan ta indica cu e averahe di edad di personanan cu ta contagia cu Covid actualmente, ta entre 40 pa 50 aña (cual no ta wordo considera un edad hopi halto of di riesgo). Sinembargo, ta mirando e edad di esnan contagia ta bahando, pa cual mester ta consciente cu si muchanan y hobennan ta contagia, esaki ta wordo transmiti mas facil na adultonan incluyendo esnan vulnerabel, Prome Minister Wever – Croes a splica.
RECOMENDACIONNAN DI GOBIERNO PA REDUCI Y PREVENI CONTAGIO:
Ta recomendabel pa evita sitio cu aglomeracion di hopi hende, principalmente si ta trata di espacionan paden. Ta recomenda pa evita di bay cerca personanan malo y laba man frecuentemente cu awa y habon pa 20 seconde. Den caso cu awa y habon no ta disponibel, por haci uzo di handsanitizer. Tambe mester evita di mishi cu boca, nanishi y wowo si no a laba man recientemente. Den caso cu ta sinti sintomanan di Covid, ta necesario pa bo keda paden, y haci un test.
Pa haci test mester yama bo dokter di cas, kende lo guia e proceso, of por hacie tambe a traves di e website di DVG, www.dvg.aw. Den caso cu bo resultado ta positivo pa COVID-19, ta hopi importante pa keda paden pa no plama e virus.
Por ultimo, considerando e situacion cu tin aworaki, Prome Minister ta recomenda pa personanan cuminsa cana cu tapaboca pa di e forma aki por ta proteha contra di e virus.
