Tatanan ta asumi diferente rolnan sinembargo estudionan ta conclui cu tatanan tin 3 rol primordial: e protector, proveedor y disciplinario. Aunke mester bisa si cu mamanan tambe por actua den e rolnan aki, e ta keda principalmente e rol di e tata.
E tata den e rol di Protector. E enfasis tradicional di un mama ta enfoca pa protege su yiu contra e forsanan of influencianan pafo di e hogar, entre otro, bullying, hendenan desconoci, cachonan peligroso, accidente, enfermedad. E instinto paternal di un tata tambe kier protege di tur esaki, sinembargo tambe nan kier prepara e yiunan tambe pa educanan con pa trata cu situacionan asina aki. Tur dos rolnan ta importante; e mama ta protege e yiu y e tata ta prepara e yiu. Un otro rol di e tata ta observa e ambiente social y conoce e amigonan di su yiunan. Ora cu su yiunan bay cas di un otro famia, nos sa kico tin den e cas ey? Nan tin arma den e cas? E bario tin criminalidad? Kico mi por haci pa protege mi yiu di un ambiente cu por ta un peliger pa nan? Tatanan tambe por garantisa e seguridad di nan yiu door di yuda forma nan ambiente social. Den otro palabra nan por wak e vecindario y por encurasha oportunidadnan pa por tin un mihor seguridad, y por elimina tambe cualkier peliger for di e caminda di e mucha.
E tata den e rol di Provedor. E tata su habilidad di provee pa su famia ta depende di su sentido di responsabilidad, identidad y hombresa. Diferente cultura tin diferente mensahenan y creencianan di kico e rol di un tata mester ta. Sinembargo mayoria hogarnan unda cu tin ambos mayor ta biba hunto, hopi tatanan no ta e uniconan cu ta prove pe famia. Mester subraya si cu esaki ainda ta un rol importante cu tatanan ta cumpli cu ne den famianan.
E tata den e rol di disciplinario. Pa prepara un mucha pa su futuro, tatanan hopi biaha tin expectativanan masha halto mes. Nan kier pa nan yiu ta exitoso, pa nan wak loke tin na e horizonte, pa nan aspira cosnan mas grandi y mas miho. Ta pesey tatanan mester siña nan yiu con pa maneha nan impulsonan, con nan por tin trankilidad ora di ta bao di stress, y con nan por lidia cu situacionan den cual nan no ta crea peliger pa nan mes of pa otronan. E ta importante como tata pa siña muchanan respet pa tur hende na tur momento y yudanan den nan disciplina pa traha huiswerk, haci trabaonan na cas y practica un deporte of hobby. Tur esaki ta inculca bon custumbernan cu lo yuda e yiunan pa madura y lidia cu e realidad di bida cu ta wardanan ora cu nan bira mas grandi.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
