Banco Central di Aruba (BCA) recientemente a conclui su Encuesta di Corupcion pa e aña 2022. E meta principal di e Encuesta di Corupcion ta pa obtene informacion valioso riba e experiencia y perception di residentenan di Aruba encuanto corupcion. Lo uza e informacion pa conscientisacion den nos comunidad riba e seriedad pa cu e problema di corupcion.
E resultado di e encuesta ta mustra cu aproximadamente 70 porciento di e respondentenan a indica cu e nivel di corupcion a crece den e ultimo 12 luna prome cu e encuesta a tuma lugar, esaki ta e porcentahe mas halto desde cu BCA a cuminsa cu e encuesta di corupcion, esta 52 punto na 2018. Na 2020 e tabata 59 porciento di e respondentenan (mira Grafiek 1).
Grafiek 1: Perception di e nivel di corupcion den e ultimo 12 luna prome cu e encuesta
Fuente: Banco Central di Aruba
Respondentenan no ta mira cu Gobierno di Aruba ta haci un bon trabou pa cu combati y frena corupcion, manera indica door di 79 porciento di respondentenan, compara cu 77 porciento den 2020. Respondentenan tambe a indica un crecemento den e pago di soborno di 7 porciento cual ta mas halto compara cu e encuestanan anterior. Notabel ta cu un promedio di 95 porciento di respondentenan, cual ta mescos cu 2020, ta considera actonan di corupcion inaceptable. Si tabata tin un bahada te na 35 porciento di respondentenan cu conoce un persona cu a paga soborno, esta for di 39 porciento den e encuesta anterior. Similar na encuestanan anterior, casi mita di e respondentenan a indica cu ta considera raporta corupcion e acto mas efectivo cu un persona por haci pa combati corupcion. Ta mira introduccion di un maneho pa denuncia iregularidadnan (“klokkenluidersregeling”) den e sector publico como e miho medida pa mitiga corupcion. Adicionalmente por raporta cu respondentenan ta considera Ministerio Publico y Parlamento di Aruba como e top dos organisacion cu lo mester percura pa combati corupcion na Aruba.
E relato completo di e Encuesta di Corupcion ta disponibel ariba website di BCA www.cbaruba.org
Banco Central di Aruba
18 october 2022
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.
Pa mas informacion tocante Banco Central di Aruba, por bishita su website www.cbaruba.org
