Minister di Enseñansa y Deporte Sr. Endy Croes despues di a ricibi un carta cu precupacion di un grupo di mayornan a invita representantenan di mayornan precupa pa un reunion . Ta trata di Grushenca Arends y Cindy Lacle kendenan e siman anterior tabata tin un conferencia di prensa unda nan a trese varios precupacion dilanti alrespecto lesnan cu ta wordo duna na algun scolnan basico publico cu a lanta hopi precupacion serca un grupo grandi di mayornan.
Den nan carta cu nan a manda pa Minister solicitando pa un reunion e grupo representando mayornan precupa a acentua entre otro introducion di ideolgia di genero den enseñansa basico como precupacion. Nan a relata cu algun scol basico a hiba muchanan mira un obra teatral cu trasfondo di e ideologia aki sin avisa mayornan. Alaves a hiba muchanan mira pelicula sin avisa mayornan. Otro scolnan ta dunando esaki como les den e materia KDN ( bergrijpen lezen) y otro scol a hasi gender swap.
Durante dicho reunion nan a amplia entre otro riba e temanan akiriba menciona den nan carta y a boga pa haña klaridad riba e maneho esta beleid di Directie Onderwijs y DPS riba e tema aki.
Nan a trese nan opinion fuerte dilanti cu no por duna mucha les di e materia aki na un edad asina hoben. Laga e mucha desaroya y na un edad mas grandi momento nan mente ta mas desaroya lo ta mas usual pa nan por wordo educa riba e tema aki.
Despues di a scucha nan cu hopi atencion Minister a splika cu e ta compronde nan precupacion. Minister a splika tambe cu a buska informacion alrespecto atraves di Directie Onderwijs y DPS. Berdaderamente algun scolnan ta usa e methodo begrijpen lezen di Hulanda cu nan ta download y e tema aki ta bin dilanti como un topico actual na Hulanda. Tanto DPS y Directie Onderwijs di nan banda a splica cu begrijpend lezen No ta forma parti di curriculum. E discusion ta keda ki ora ta e momento pa brinda muchanan conosemento riba e topico aki. Hopi ta pensa den scolnan basico ainda no ta prudente y otronan ta pensa esaki ta keda deber di e mayor pa por educa e jui riba e tema aki y otronan ta pensa desde scol segundario. DPS a accentua manera cu e maneho ta actual esta cu e topico aki no ta forma parti di curriculum di Basis Onderwijs y scolnan basico lo mester percura pa cumpli cu e curriculum di acuerdo cu e beleid. Representantenan di mayornan precupa a keda contento cu den un periode basta chikito y mei mei di preparacionnan festivo Minister a traha tempo pa scuchanan. Manera Minister semper ta bisa cu su portanan semper ta habri pa reuni cu tur hende den comunidad.
