Un cas Arubiano renoba y bebida traha na Aruba
Diasabra Minister Maduro a pasa admira dos proyecto, Pepe Margo y Calypso, cu ta proyectonan cu e hoben entrepreneur Jonathan Harms hunto cu su Tata Milton Harms a desaroya y den cual nan ta brinda honor na Aruba.
Cas di pepe Margo como destileria di rom artesanal
E cas di e pepe di sr. Milton, sra. Margo Wever den feliz memoria, situa entre Wilhelminastraat y Zuidstraat, a keda transforma den un destileria di rom artesanal cu ta hiba e nomber ‘Pepe Margo’, na honor di sra. Margo cu a habita e cas. Sr. Milton Harms a conta cu su pepe Margo tabata traha cos dushi y tabata bende esaki fo’i e bentana di cushina cu ta habri riba Wilhelminastraat. E cushina di e cas estilo Arubiano aki cu recientemente a keda renoba den su gloria, awor lo bay conta tambe e storia di e hoben comerciante Jonathan Harms, ya cu ela sa di transforma e cushina den un destileria di rom y a duna e producto local aki e nomber ‘Pepe Margo’. Un proyecto bunita den cual ta rescata un di nos casnan estilo Arubiano y ta duna nos localnan y turistanan e oportunidad di mira di cerca e produccion di un rom traha na Aruba.
Bebida Calypso traha na Aruba
Minister Maduro a haci un bishita tambe na e otro proyecto di e hoben entrepreneur Jonathan, cual ta e planta di Calypso cu ta e prome bebida hard seltzer produci na Aruba. Jonathan a transforma e magashina unda cu Famia Harms hopi decada atras a cuminsa cu nan negoshi, den un planta di produccion moderno di un bebida alcoholico di awa carbonisa den cuater diferente sabor. A duna e bebida e nomber Calypso y riba e emblema por mira Aruba su nomber y e Faro di Westpunt.
Minister Maduro ta felicita Famia Harms, specialmente e hoben Jonathan Harms cu e dos bunita proyectonan aki den cual ta duna honor na Aruba. ‘E ta un placer pa mira un Arubiano bay dilanti y den e proceso duna balor na Aruba. Masha danki pa kere den Aruba,’ tabata palabranan di Minister Maduro na final di su bishita na e dos proyectonan mas nobo di Famia Harms.
