Dialuna mainta 6 di November tabata e comienso di caso Flamingo. Un total di 6 sospechoso a wordo cita dilanti mesa berde pa cuminza trata e caso pro forma. Un Hues di Hulanda a trata e caso cu tabata un “regie zitting”. Den caso pro forma hues y abogadonan ta deliña tur aspecto di e caso, si tur documento tey, si tin testigo pa wordo scucha, etc etc.
Abogado pa Otmar Oduber ta mr. Carlo.
SOSPECHOSO GILBERTO TIEL NO A PRESENTA
Den sala di Corte tabata presente un total di 5 sospechoso: Otmar Oduber (51), Eisia Esser, Richinella Wever Croes, Jeandrick Oduber (yiu di Otmar) y Laurence Phillips. E sospechoso Gilberto Tiel no a presenta pero Fiscal a bisa cu ta sigui cu su caso.
Tabatin dos otro persona cu cu a yega na acuerdo cu Ministerio Publico y no mester a presenta den corte.
ACUSACIONNAN
Fiscal a acusa Otmar Oduber cu entre 2017 y 2020 a duna dos tereno na Malmok cu supuestamente no tabata mag di wordo duna. Esey ta hiba e nomber caso Malmok.
Tambe Fiscal a bisa cu ta acusa Otmar Oduber di trahadornan di Gobierno cu nunca a presenta pa traha pero ta cobra salario. Ta trata aki di Tiel, Phillips y Geerman. Tambe ta acusa Otmar Oduber di a wordo cumpra door di Geerman y Tiel. Fiscal a bisa tambe cu ta acusa Otmar Oduber di a mal usa su funcion como minister door di duna terenonan.
Acusacion contra Esser:
Fiscal a acusa Esser di ta complice di a wordo cumpra entre November 2017 y 2020. E lo a tuma cosnan y tambe e ta wordo acusa di a mal usa su funcion.
Acusacion contra Richinella: ta wordo acusa di a falsifica documento relaciona cu dunamento tereno na DIP
Acusacion contra Phillips; ta worde acusa cu entre Januari 2018 y Juni 2020, a malversa placanan.
Acusacion contra Tiel; ta acus’e di a malversa entre October 2018 y 2020. Tambe cu el a cumpra Otmar door di traha pa Jeandrick.
Acusacion contra Jeandrick: ta wordo acusa di malversacion entre October 2018 y Juni 2020
Esaki ta entre otro den liña grandi e tratamento di e reggie zitting, unda mas bien tur esnan envolvi y nan abogado por a hasi nan peticion of deseonan pa cu e caso.
Abogadonan a trece varios peticion y hues lo dicta sentencia diahuebs awor.
E caso cu tur detayes lo wordo trata den simannan nos dilanti.
