A yega na mi atencion cu hotelnan ta sigui instrui nan security na beach cu localnan no por sinta bao e palapanan di hotel, pasobra e ta nan propiedad. Esaki ta crea un disgusto pa e localnan cu cada bes tin menos beach pa disfruta di dje, specialmente na Palm Beach. Hotelnan ta hasta bay asina leu di huur nan palapa na turista, y pesey ta pone security controla palapanan pa niun hende local bay sinta bao di nan. Full fout!
Beach ta patrimonio di pueblo
Ningun beach ta propiedad di hotel, e ta patrimonio di pueblo. Hotelnan ta haya permiso pa pone palapa riba beach, pero no por prohibi persona local, of turista di otro hotel pa bay sinta of drumi den e sombra di e palapanan aki. Poco tempo pasa tabata tin un incidente unda localnan a yama polis pa un situacion di palapa. Polis mester a intermedia y a bin coregi e empleadonan di e hotel riba nan comportacion. Ley ta hopi specifico cu ta pueblo ta doño di e beach y tin e derecho legal pa por disfruta di dje unda cu e kier, sin wordo stroba. Intervencion di siguridad di hotel of cualkier otro empleado pues ta un accion contra ley y un comportacion inacceptabel.
Pueblo, bo ta doño di tur beach
Ta mas cu claro anto cu pueblo ta doño y tin libertad pa bay cual beach cu nan kier y sinta unda cu e kier. Awe mi ta skirbi riba e tema aki pa fortalece y confirma e derecho di nos pueblo. Niun hende por kita nos derecho sagrado di disfruta di nos patrimonio y ta importante pa confirma pueblo esaki den mi articulo.
