Despues cu a firma un MOU entre SV RCA (Aruba), Victory Boys (Corsou) y SV Flamingo di Boneiro, e tres clubnan ta anuncia cu orguyo e siguiente paso den e aliansa ABC. E meta principal di e clubnan ta pa habri caminda pa desaroyo di coach y hungado.
Cu gran placer, RCA, Victory Boys y SV Flamingo ta presenta un colaboracion historico cu US Soccer Coaching Education di Georgia State. Como parti di esaki, e prome sesion di e curso “Grassroots & D License” lo tuma luga di 23 pa 27 di september 2024 na Aruba. Dos instructor di US Soccer lo biaha pa Aruba pa lidera e programanan. Esaki lo ta exclusivamente p’e coachnan di RCA, Victory Boys y SV Flamingo.
Licencia di US Soccer ta reconoci pa Concacaf, marcando un paso importante pa desaroyo di futbol riba e islanan ABC. E curso normalmente ta dura seis luna, pero ta adapta specialmente pa nos islanan pa duna 26 coach e oportunidad pa completa esaki den un periodo mas cortico.
Pa prome biaha den historia, un club for di Merca ta organisa un curso pa US Soccer D License, marcando un momento historico pa desaroyo di futbol den e region Caribe. Aunke e curso aki ta limitado pa coachnan di RCA, Victory Boys y SV Flamingo, e clubnan ta traha pa habri esaki pa mas club den futuro. Esaki lo yuda pa eleva futbol riba Aruba, Boneiro y Corsou.
E colaboracion cu US Soccer Education tambe ta duna dos luga p’e coachnan di e islanan den e “C License Course”, cu tin solamente 100 luga disponibel na Merca pa cada sesion. E oportunidad aki ta un paso clave pa esunnan cu kier desaroya nan mes como coach profesional.
Ademas di esaki, na cuminsamento di 2025, e clubnan ta planifica un “College Clinic”. Mas informacion tocante esaki lo sigui den futuro. Jeff Lopez, presidente di RCA, ta bisa: “Esaki lo habri hopi porta nobo y ta crea oportunidad pa nos hubentud logra nan soño. Nos ta crecendo, hunto.”
