Ken entre boso ta teme Señor,ken ta obedece e bos di Su Sirbido,ken ta cana den scuridad y no tin lus?
Lage confia den e nomber di Señor, y depende riba su Dios.( Isaias 50:10).
Pesey tambe Dios a hals’E te na e halturanan y a dun’E e nomber riba tur nomber, cu pa e nomber di Hesus tur rudia mester dobla, di esnan cu ta den cielo,y riba tera, y bao di tera,y cu tur lenga mester confesa cu Hesus Cristo ta Señor.Pa e gloria di Dios Tata. ( Filipensenan 2:9-11).
E confiansa den Dios, e temor di Dios, e Fe den Dios, ta sumamente necesario pa nos logra nos metanan den bida, mas nos kere den Dios, mas bendiciona nos ta, Pasobra su palabra ta bisa lo siguiente:
Lo mi duna boso un curason nobo,y pone un spirito nobo den boso,y haci boso cana den Mi statutonan y boso lo percura di cana den mi ordenansanan. Lo mi kita e curason di piedra for di boso y duna boso un curason di carni.(Ezekiel 36:27)
E cambia den nos bida, ta solamente den Cristo nos por logre, nos no por cana pa bista, nos mester cana pa Fe, pasobra ta solamente Dios sa locual nos mester, e tin poder pa libera, pa sana, pa cambia nos curason,y nos pensamentonan.
E palabra di Dios ta demostra nos mas cu tur cos den e ultimo temponan aki, pa nos no confia den nos mes, pasobra seguridad ta bini solamente for di Cristo Hesus, ta tempo pa pone tur cos den man di Dios, nos bida , nos cas y nos famia, y no duda den e palabra di Dios, pasobra duda ta ladron di bendicion.
Cu tur confiansa nos mester aserca e trono di gracia di Dios prome cu tur cos, y ricibi direccion di Dios pa nos bida, pasobra nos tin cu agrada Dios cu nos bida,( Galationan 1:10).
Tin un spirito di materialismo y falta di amor cu kier ataca nos hobennan, y haci cu nan ta pone nan bista riba cos enbes di riba Dios, cu material ta bira asina importante pa nan, y cu bida di nan prohimo ta bira menos importante, esey ta locual Pablo a scirbi pa nos den 2 Timoteo 3:1-5 cu den e ultimo temponan lo tuma lugar.
Pablo ta menciona tur locual lo tuma lugar den bida di hende ora nan kita nan bista riba Dios, y hasta crea idolo pa nan mes, mirando solucion den hende y no den Dios.
Nos oracion mester aumenta den nos hogar, pa nos famia , pa Dios tene misericordia, pasobra nos tur mester tene bon na cuenta cu Dios ta dicidi, y no ta hende ta dicidi, hende por tin hopi plan pero Dios ta esun, cu tin e ultimo palabra. E ta nos creador , nos Redentor, nos Baranca fuerte Esun cu tin tur poder, y no tin mas grandi cu Dios. Pesey ta necesario pa mantene nos confiansa, y fe den Señor,
Ta tempo pa nos haci tur locual ta na nos alcanse pa nos hubentud gara na e caminda di Dios, pasobra e plannan di destruccion di e enemigo ta serio, pesey nos mester pidi Dios pa trece un cambio den nan curason, y e cambio ey no por wordo logra cu placa, pero solamente cu e palabra di Dios, pa nan reconoce nos Señor Hesus Cristo y deposita nan Fe den dj’E, Pasobra Cristo Hesus ta e unico caminda di berdad y bida.
E merece nos confiansa tur momento.
Sinceramente , Pastor Marcel Balootje
