Boso no sa, cu unabes cu boso ta casa pa Dios den e Sacramento di Matrimonio, boso ta keda casa pa Dios te na morto y Dios no ta reconoce divorcio. Awor, si boso a divorcia y boso ta biba cu otro persona, anto ta con boso por yama boso companjante, esposo of senjora, maske cu boso ta casa pa raad? Boso no tabata sa cu boso ta bibando den e pika condenabel di adulterio? E pika di adulterio ta condenabel pa Dios y na tur esnan cu muri den nan pikanan di adulterio, nan lo no drenta den e Reino di Dios y nan destino final ta den fierno. Mester compronde cu e di 6 Mandamento di Dios Tata ta bisa bon cla: “Lo bo no comete e pika di adulterio.” Lesa den Bijbel Mateo 5: 32, na unda Senjor Hesus ta adverti bon cla: “Ami ta bisa boso: Ken cu divorcia di su senjora, si no ta pa motibo di infieldad, e ta pone su senjora comete adulterio. Es cu casa cu e senjora divorcia, e tambe ta comete adulterio.” Akinan nos por compronde bon, si un homber divorcia di su senjora, anto e ta provoca su senjora di bay biba cu un otro persona den e pika di adulterio. Akinan e homber cu a divorcia di su senjora, ta keda responsabel di su senjora cu el a divorcia.
Na e dia di huicio dilanti di e tribunal di Dios Tata, e homber y e muher tin cu duna cuenta di nan actonan di infieldad, di divorcio y di adulterio. P’esey e pareha mester uni bek, pa nan ta salba.
Lesa den Bijbel Marko 10: 6-9 : “Na principio di creacion, Dios a traha homber y muher, p’esey e homber lo laga su tata y su mama pa e uni cu su muher y nan dos lo bira un solo curpa. Di manera cu nan no ta dos mas, sino un solo curpa. Pues loke cu Dios a uni, no ta permiti pa hende separa.” Esaki ta e Sacramento di Matrimonio di Dios den Misa, na unda cu Dios ta uni e pareha den un solo curpa, pa medio di un sacerdote y cu dos testigo. Tambe bo por compronde, cu Dios no ta reconoce divorcio, maske cu e pareha a divorcia pa Raad, pa Dios nan ta keda uni te na morto. Si e pareha a divorcia pa Raad y a separa, anto nan mester laga e caminda habri. Esey kiermeen, cu nan no mester busca ningun otro persona den nan bida. Pasobra, e union di un solo curpa ta inkebrantabel y tambe pa e pareha separa por uni bek, pa nan no cay den e tentacion di sexualidad cu otro persona den adulterio. Boso no a hura pa Dios dilanti di altar, cu boso lo keda fiel den bon tempo y den tempo di adversidad, den tempo di abundancia y den tempo di pobresa, den tempo di salud y den tempo di enfermedad, den tempo di pas y den tempo di pleito y di stima otro manera bo mes y di keda fiel te na morto?
E pregunta ta, ta na unda boso huramentonan a keda dilanti Dios? Laga nos lesa den Bijbel Mateo 5: 33, na unda cu Senjor Hesus ta bisa tocante huramento : “Tambe boso a tende loke a ser bisa na boso antepasadonan: Lo bo no kibra huramento y lo bo cumpli loke cu bo a huramenta na Senjor.” Akinan, boso no a huramenta dilanti di Dios den Misa, di keda hunto y fiel cu bo pareha te na morto? Den Bijbel Huan 4: 5-42, akinan nos por lesa, ora cu e muher Samaritana a pidi Hesus p’e haya e awa di bida eterna, p’e no haya sed di awa nunca mas, anto Hesus a bise’le, bay busca bo esposo y bin cun’e cerca Mi. E muher Samaritana a bisa Hesus, mi no tin esposo, anto Hesus a bise’le, bo tabata tin 5 homber y e homber cu bo ta bibando cun’e awor, no ta bo esposo. Akinan nos por compronde cu e muher Samaritana ta bibando den e pika grandi di adulterio, pasobra ela divorcia di su prome casa, pa despues ela bay biba cu diferente homber den e pika di adulterio. Akinan tambe, Senjor Hesus ta bisa na esnan cu a divorcia y ta bibando den e pika di adulterio, pa nan bay busca nan senjora of nan esposo bek, pa nan por ta salba. Lesa den Bijbel 1 Corinthionan 6: 9 y 10: “Boso no sabi, cu e inhustonan lo no drenta den e Reino di Dios? No ganja boso mes, pasobra ni e fornicadornan, ni e adoradornan di diosnan falso, ni esnan den adulterio, ni e homosexualnan, ni e ladronnan, ni e burachenan, ni e blasfemadornan, ni esnan golos pa plaka, ni e abusadornan, nan tur lo no drenta den e Reino di Dios.”
Tambe den Bijbel Testament Bieuw Levitico 20: 10, na unda cu Dios Tata ta bisa: “Si un homber ta comete adulterio cu un muher casa di su prohimo, nan dos lo muri, e adultero y e muher adultera.” Akinan, e homber soltero cu biba companja cu un muher divorcia, e homber tambe ta ser condena den fierno, pa su pika di complice di adulterio cu e muher y kibrador di matrimonio, pasobra el a stroba e caminda di e muher.
Nunca no biba cu un persona divorcia, pasobra e persona divorcia ta keda casa pa Dios.
P’esey cambia boso bida prome cu ta laat, kita e baranka cu ta stroba boso, pa boso no ser condena den e candela di fierno despues di morto.
Scirbi pa: Seferino Tromp.
