NO gaña boso mes, Dios no ta laga ningun hende haci bofon di dj’E, pasobra loke un hende sembra esaki tambe e lo cosecha.( Galationan 6:7)
For di prinsipio di mundo un di e metanan di e diabel tabata , pa hende haci bofon di Dios, sabiendo e berdad pero toch ta haci lo contrali, Mescos cu Adam a haci.
Cuanto hende awendia no ta biba den rebeldia contra Dios, y hasta esnan cu conoce Dios ta haci bofon di Dios.
Un hende cu a haci un promesa matrimonial, y despues ta cuminsa pone adulterio como ruta pa su bida, no tin excuus, e ta haciendo bofon di Dios, di su pareha, y tambe di su famia, pasobra locual e a priminti dilanti di Dios y di hende , awor e ta destrui.
Ora un tata no ta cria su yiu, e ta haciendo bofon di su yiu,cual ta e motibo cu nos tin hopi mucha kende pa motibo di e trato cu nan a ricibi serca nan mayornan awe ta den mal caminda, pasobra enbes di a wordo stima , bofon ta wordo haci di nan y nan sentimento.
Ta hopi tristo ora un homber tin yiu cu dos diferente muher, anto uno ta hala pa ki banda, bisando pa no worry cu e yiu cu bo tin cu e otro ayabanda, wak esun cu bo tin awor.Y asina e homber bobo ta wak un yiu so, y laga e otro of otronan pasa den necesidad. Ta un historia cu ta ripiti constantemente.
A yega di sosode cu tin dos mucha den un klas di scol, un tin tur cos, pero e otro no tin nada, pero nan dos ta di mesun tata, un ta ricibi atencion, pero di e otro ta wordo haci bofon.
Ora un muher mester pidi un homber placa pa cuminda di su yiunan, y e homber ta mira cu e muher ta yame, pa e cria su yuinan, y e no ta haci caso di e yamada, e homber ey ta un bofonado.
Ora un pober ta sclama pa ayudo y nos tin pa yude , pero nos no ta yude, nos ta haci bofon di Dios.
Pesey Dios ta bisa den su palabra , Mi ta tabatin hamber y boso no a dunami di come, mi tabatin sed y boso no a dunami di bebe, y hende lo puntra Señor ki dia esey a sosode, y Señor ta bisa cu cada biaha cu nos duna na un hende den necesidad ta mescos cu ta na dj’E nos a duna.
Cada biaha cu hende ta haci cambio den nan bida cu ta desvia nan mes for di e creacion original di Dios, nan ta haci bofon di Dios, pasobra Dios su creacion ta unico, e a forma hende den barica di nan mama den un forma unico, Dios a crea homber y muher y a duna nan autoridad pa multiplica y goberna e mundo.
Pero e enemigo a presenta y trastorna mente di hende, pa asina enbes di obedece Dios, nan ta haci bofon di Dios cu tur e consecuencia cu ta para scirbi pa nos tur den Galationan 5:19-21 y Romanonan 1:28 -32.
Ta un urgencia pa hende bolbe bek na Dios y sali for di e ruta di bofon y rebeldia contra Dios, pasobra tur locual hende sembra nan lo cosecha.
E unico forma pa hende no cosecha tur e , bofon y rebeldia cu e mes a sembra, ta door di arepenti, confesa, y aparta di maldad.Pa evita e furia di Dios.(Juan 3:36).
Sinceramente, Pastor Marcel Balootje
