mr. Wendrick Cicilia (AVP): E momento pa miho recompensa pa hoben profesional ta awor

Tur hende ta consciente cu Aruba tin cu aumento e cantidad di personanan cu ta gradua di un estudio avansa, hisa nivel di e institutonan educativo y reduci e drop-out na Aruba. Pero ademas di ta consciente di e resultadonan menciona, mester haci algo tambe. Mester bini cu un plan general, unda cu principalmente mester modernisa e curiculo di nos scolnan secundario y esnan di preparacion pa un estudio. Esaki ta e pensamento di e politico mr. Wendrick Cicilia, kende ta number un riba lista di AVP.

mr. Cicilia den e bishita na diferente bario di Aruba, a topa cu dos tema di preocupacion bou di e ciudadanonan di cual un di nan e escasez di hobennan pa drenta e mercado laboral. Principalmente esnan cu gradua na Hulanda, hopi di nan no ta bolbe Aruba.

Aworaki esnan cu ta finalisa nan estudio na Hulanda, mr. Cicilia a bisa e ciudadanonan, ta haya miho oferta na Hulanda y miho oferta di bida en general cu ta pone nan tuma e decision pa cuminsa nan carera na Madre Patria. 

Tin diferente aspecto cu ta hunga un rol cerca un recien gradua, despues di a biba mas cu cuater aña na Hulanda. Ta cuminsa cu miho oportunidadnan pa biaha y haya experiencia, y miho salario. A pesar di e circunstancianan menciona, e hoben politico ta kere cu por haci varios cos pa atrae mas hoben bek pa nan pais. Esey ta un di temanan cu a atende durante un biaha cu el a realisa aña pasa pa Hulanda.  A scucha di e hobennan bisa cu nan ta bay atras den salario, no ta haya vivienda y costo di bida ta hopi halto.  

Pa loke ta nan carera profesional, mr. Cicilia a bisa cu el scucha for di e hobennan e preocupacion cu e oportunidadnan pa sigui crece na Aruba ta limita. E ta consciente cu no ta tur aspecto por cambia, sinembargo tin algun punto manera mehora of yuda alivia e pago di studielening, crea un duo-lening, etc. E sistema actual ta u e duo-eking no ta pisa asina hopi mas pero si e Aruba lening. Y riba e ultimo aki, e politico ta kere por bini cu un reduccion pa e graduadonan y trece algun hoben mas bek pa nan pais.

El a conta su mes mesun experiencia despues cu el a gradua for di Universidad di Aruba. Ora cu el a bay busca trabou, nan a dun’e un oferta unda cu a ofrece un salario minimo. “Mi ta kere cu esaki ta un falta di respet pa un hoben cu a inverti den su estudio, cu a haci esfuerso pa capacita su mes y bo no ta dun’e un recompensa. “Mi ta kere cu esaki ta un punto cu mester stimula riba mercado laboral, pa ofrece miho beneficio y reconoce e esfuerso cu e hoben a haci pa finalisa su estudio.”

E ta kere cu mester tin un miho salario pa un graduado cu bolbe su pais, “pa no ofrece un peanuts di salario, pasobra nan no merece esey. Mercado laboral tin suficiente espacio pa recompensa nos profesionalnan bastante bon. E mester ta parti di un vision integral unda por ofrece diferente opcion di vivienda pa e situacion atractivo pa e hobennan bolbe. Aruba tin un escasez di profesionalnan den departamento gubernamental y den mercado priva. Nos miho talentonan ta bay afo pa yuda otro paisnan desaroya.”

Tocante Wendrick Cicilia

mr. Wendrick Cicilia ta un hoben hurista y candidato di Partido di Pueblo Arubano (AVP). Prome cu drenta politica a traha den banco y oficina di abogado. Su pasion pa yuda su prohimo a hib’e na ta un di e fundadornan di Tienda di Ley na 2018. E la gradua na 2019 for di e Facultad di Derecho di Universidad di Aruba. Na 2021 a tuma e curashi y determinacion pa subi e lista berde. Durante e ultimo eleccion Wendrick Cicilia a logra convence 482 ciudadano cu nan voto, profilando su mes den e top 10 cu mas voto di tur e 29 candidato rib’e lista di AVP. For di 2021 e ta consehero legal di e fraccion AVP den parlamento. Na october 2024 e la logra su titulo di meester in de rechten. 18 October 2024 e la bira lider di e lista di AVP, pues e lijsttrekker mas hoben den historia di Aruba.