Nos ta na vispera di un siman importante, na unda hopi cosnan serio ta sosodiendo.
Manera ta conoci tin tension entre Aruba y Hulanda pa un Rijkswet Financieel Toezicht, unda Hulanda ta abusa di su poder pa trapa riba Aruba. Algo cu lo skirbi historia y lo lanta e sentimentonan colonista den nos pueblo di oprecion cu nos grandinan a biba, tempo cu nos tabata wordo humiya den 1920 pa 1986.
Riba nivel local Gobierno ta habri un siman nobo cu lo mester bay tene tur sorto di cumbre y reunion cu gremio comercial y sindical como tambe un cumbre politico pa debati e rijkswet aki.
Aparte di reunionnan local Gobierno lo mester sigui reuni cu Hulanda. Sin e prestamo di Hulanda, ningun hende na Aruba por cobra salario.
Mei mei di tur e situacion aki, dia 10 di juli Gobierno ta obliga pa habri bek e ruta cu Merca unda Turistanan lo cuminza yega bek. Merca ta e epicentro di coronavirus. Pues esaki ta otro presion y tension cu mester deal cune y no por haci otro, pasobra Hulanda ta keda choca nos mata, pues si nos no muri di corona, Hulanda ta mata nos!
Aparte di esaki, investigacionnan riba corupcion ta sigui avansa. Esaki ta envolve politiconan y e biento por supla den varios direccion. Tin un cantidad di investigadornan Hulandes presente na Aruba, kendenan ta avansando hopi rapido den varios casonan. Durante simannan tras di lomba, varios persona liga na politica a wordo yama y interoga pa landsrecherche. Pues, nos ta sigui monitor e investigacion pa corucpion. Manera nos por sigui declaracionnan di politiconan Hulandes, nan enfoke awor ta riba corupcion politico. Knops, Bosman, Van Raak y Rutte ta papiando mes un idioma. Nan kier manda un signal fuerte contra corupcion na ARUBA. No keda sorpresa cu e biento aki lo por supla den varios direccion.
Aparte di esaki, tin intrankilidad den eseñansa como tambe den Guarda nos Costa. Ilegalnan ta huy o sea Guarda nos Costa no tin control di e ilegalnan cu ta deteni. Aki tambe Gobierno mester bay pone su atencion.
Riba e manifestacion di Ta Basta, riba abuso di mucha, tambe Gobierno mester bay analisa kico e ta bay hasi. Pueblo tin e percepcion cu Gobierno no a haci nada. Pues Gobierno no a bende su trabao bon, pasobra maske Gobierno kemen cu nan a haci hopi, pueblo eyfo no sa net net nada kico a wordo haci riba abuso di mucha.
Riba tur esaki, casonan di Corona a cuminza aumenta bek, cual tambe tin pueblo cu preucupacion. Un siman tin 5 dia, y nos ta para dilanti 5 dia di tension.
Ta spera cu Hulanda por recapacita y stop di choca nos mata! Nos lo no lubida e maltrato di Hulanda contra nos pais den tempo di crisis! Nos ta di acuerdo cu tur sorto di recorte y tur sorto di reforma, pero bo no por tin nos na suela y ta sigui bati nos mata.
Loke Hulanda ta haciendo cu Aruba, ta loke el’a haci tambe cu Italia y Spaña! Aya na Europa si nan a para nan stof pa nan! Pasobra Hulanda a haye ta manda pidi disculpa pa su expresionnan sin compacion cu el’a expresa contra Italia y Spaña. E potencia Italia y Spaña por a pone Hulanda den su lugar, pero nos isla indefenso, sin otro salida pa cu e situacion, ta obliga di para wanta sla. Tin un dicho ta bisa: No haci cu otro loke bo no kier pa nan haci cubo! Pues, Hulanda su dia lo yega!
