Gobierno ta invita pueblo di Aruba pa asisti na e celebracion di Dia di Rey cu lo tuma luga diasabra, 26 di april, cuminsando 8:30 di mainta na Parke Wilhelmina.
Durante e acto oficial lo tin presencia di Gobernador S.E. Alfonso Boekhoudt, Ministernan di Gabinete AVP-Futuro, Miembronan di Parlamento, y demas invitado.
E celebracion lo habri cu un acto protocolario, incluyendo inspeccion militar, discurso di S.E. Gobernador Alfonso Boekhoudt sigui pa Presidente di Parlamento sr. Marlon Sneek y Prome Minister Mike Eman. Ademas lo tin presentacion di baile di grupo Kids & Youth in Action y canto di Reanne Ras y Stephany Quandt.
E actividad lo culmina cu e entrega di premio “Copa Hubenil Gobernador Felipe B. Tromp” y medaya pa un miembro di Arumil.
Ta urgi comunidad pa tuma nota di e cambio di trafico riba e dia aki entre 7’or di mainta pa 11’or di mainta. Lo desvia trafico den direccion pabao na e crusada di L.G. Smith Boulevard-Adriaan Lacle Blvd, via Wilhelminastraat, y por subi L.G. Smith Boulevard bek na altura di Royal Plaza. Lo desvia trafico den direccion pariba na e crusada di Ex-DOW y por subi L.G. Smith Boulevard na altura di Irenestraat bay ariba.
