Vacation Rental Professionals of Aruba ta pidi esnan encarga cu maneho pa adopta leynan bon pensa y basa riba evidencia cu ta sostene crecemento sostenibel di vacation rentals mientras ta atende cu e necesidadnan di vivienda accesibel na Aruba. VRPA a entrega un carta na e Formadornan dia 13 februari, 2025, cu ta contene resultadonan di investigacion, data economico y recomendacion di manehonan cu ta sostene e meta aki. Poco despues di a haci entrego, e miembronan di VPRA a reuni cu esnan encarga cu maneho.
Mientras discusionan ta andando, informacion publico limita a crea incertidumbre stimulando VPRA pa reitera nan posicion y mantene e comunidad informa.
VRPA, un organizacion cu ta representa doñonan y managers di propiedadnan di vacation rentals, a haci un investigacion extensivo den colaboracion cu expertonan di e industria y a presenta recomendacionnan detaya na Gobierno di Aruba. E dato ta subraya tanto e balor economico como e complehidad di e rol cu e sector di short-term rental tin den e panorama di vivienda di e isla.
No por Ignora e Impacto Economico
Segun e raport di Aruba Tourism Authority di februari 2025, vacation rentals ta conta pa 41.9% di tur bishitante – demonstrando e forsa y importancia continuo di e segmento aki
apesar di e caida leve di 0.4% di tur yegada. Vacation rentals ta keda un forsa vital y stabilisa di Aruba su economia di turismo y ta proyecta pa genera ingreso directo di mas di $250 miyon e aña aki. E contribucion economico mas amplio di e sector ta estima na $600 miyon. Short-term rentals ta beneficia un rango amplio di negoshinan local—di supermercadonan te operadornan di tour—promoviendo un economia circular unda gasto ta keda den e comunidad.
Compara cu desaroyonan di hotel tradicional, short-term rentals ta decentralisa oportunidad economico. Arubianonan ta doño di aproximadamente 50% di e propiedadnan, y hopi ta wordo maneha pa emprendedornan chikito. E modelo aki ta yuda democratisa participacion economico, distribuyendo entrada mas amplio rond di e isla.
Pa hopi Arubiano, vacation rentals no ta solamente un inversion—ta un manera di genera entrada. E ta yuda famianan paga hipoteca, sostene penshonadonan, y ta duna e generacionnan mas hoben un caminda pa emprendimiento. E economia di vacation rental ta ofrece oportunidad na nivel individual y comunitario, permitiendo mas hende pa participa y beneficia di e industria di turismo di Aruba.
No Ta Causa di Crisis di Vivienda
VRPA ta enfatisa cu vacation rentals ta wordo culpa inhustamente como e causa principal di falta di vivienda accesibel na Aruba. Investigacion di UCLA y Universidad di Southern California ta indica cu un aumento di 10% den lista di Airbnb ta contribui na un aumento di solamente 0.76% den prijs di vivienda. E motibonan real di e crisis di vivienda di Aruba ta inclui un cantidad limita di vivienda nobo, costo di construccion halto, impuesto di importacion, burocracia, y falta di planificacion a largo plaso.
“Na Aruba, e reto no ta short-term rentals—ta e falta di desaroyo di vivienda accesibel y restriccionnan di zonificacion cu ta anticua,” asina Alex Cybul, Miembro di Directiva di VRPA, a bisa.
Un Plan pa Regulacion Inteligente
VRPA ta sostene impuesto husto y regulacion y a recomenda algun medidanan di maneho, incluyendo:
• Implementa coleccion di room-tax, cu lo por genera mas cu $40 miyon anualmente. • Aloca un parti di e impuesto relaciona cu turismo pa financia iniciativanan di vivienda accesibel.
• Simplifica procesonan gubernamental di erfpacht y permiso di construccion.
• Elimina restriccionnan anticua riba desaroyonan di condominium den zonanan turtistico indica manera Palm y Eagle Beach.
• Implementa strategianan di zonificacion y maneho di prijs pa controla e demanda mientras ta preserva e identidad di comunidad.
E asociacion ta boga tambe pa regulacion cu ta eficiente y minimalmente burocratico, usando plataformanan digital di registracion y cumplimento, y segura transparencia den calculacion di impuesto.
VRPA ta kere den un Aruba unda oportunidad ta wordo comparti—unda crecemento di turismo ta beneficia localnan prome, y unda solucionnan pa vivienda ta wordo diseña cu honestidad, sostenibilidad, y cu e bienestar di comunidad a largo plaso den mente.
Buscando Colaboracion, No Confrontacion
VRPA ta enfatisa su disposicion pa traha cu gobierno pa desaroya legislacion responsabel y efectivo. “Nos no ta contra regulacion. Nos ta para pa regulacion inteligente— manehonan cu ta proteha residentenan, respeta derecho di propiedad, y cu ta permiti e sector di vacation rental pa sigui contribui directamente na e economia di nos isla,” Cybul a bisa.
Tocante VRPA
Vacation Rental Professionals of Aruba (VRPA) ta un asociacion no gubernamental cu ta representa doñonan y operadornan di propiedadnan den e sector di vacation rental na Aruba. E organisacion ta sostene regulacion husto, cumplimento di impuesto, y desaroyo responsabel di e industria pa sigura cu beneficionan wordo comparti dentro di e comunidad Arubiano.
