Dialuna mainta pa 9:00 am a habri siman cu un prome bishita di e crucero Sapphire Princess. Gerencia di Aruba Ports Authority a subi abordo di e barco crucero pa yama nan bonbini na Aruba y a intercambia algun regalo pa no lubida e prome bishita aki, di hopi mas cu lo bin den e temporada halto di crucero cu apenas a cuminsa.
Sapphire Princess ta un barco di crucero di Princess Cruises, construi door di Mitsubishi Heavy Industries na Nagasaki, Hapon y entrega na e compania dia 27 di mei 2004. E ta barco ruman di Diamond Princess y ambos ta basa riba e diseño di clase “Grand” di Princess Cruises.
Un di e detayenan mas interesante di su historia ta cu Sapphire Princess originalmente lo a yama Diamond Princess. Durante su construccion, un candela grandi a afecta e barco na october 2002. Pa mantene e programa di introduccion di e dos barconan, e compania a intercambia nan nomber: e barco cu por a termina prome a bira Diamond Princess, mientras esun cu a sufri daño y cu mester a reconstrui a ricibi e nomber Sapphire Princess.
Dia 10 di juni 2004 a batisa Sapphire Princess na Seattle, Merca, cu Nancy Murkowski, e Prome Dama di Alaska e tempo ey, como madrina. Su prome temporada tabata enfoca riba cruceronan pa Alaska saliendo for di Seattle. Despues, e barco a amplia su trayectoria cu rutanan pa Riviera Mexicano y Australia.
Sapphire Princess ta midi aproximadamente 290 meter di largura y tin un tonelada bruto di 115.875 GT. E tin capacidad di 2.680 pasahero y aproximadamente 1.100 tripulante. A bordo tin restaurantnan, piscina, teatro, casino, spa, centro di fitness y e cine den aire liber “Movies Under the Stars”.
Princess Cruises ta mantene un relacion comercial y di colaboracion cu Aruba Ports Authority, cu ta refleha den bishitanan di varios barco di su flota den e waf di Oranjestad. APA ta mantene contacto cu e linea di crucero pa fortalece e relacion y explora mas oportunidadnan pa nos isla. E presencia di barconan manera Sapphire Princess ta forma parti di e conexion continuo entre Princess Cruises y Aruba como destino di crucero den Caribe. Por ehempel e luna aki so APA a y o yama bonbini na cruceronan di e mesun compania aki, manera ta Sapphire Princess, Caribbean Princess, Majestic Princess y Regal Princess.
