Den un bishita di cortesia, Minister-President di Hulanda, Sr. Dick Schoof y su delegacion, acompaña pa minister Geoffrey Wever, a bishita Alto Vista Winery y chicken farm, un iniciativa unico y visionario lidera pa empresario Arubiano, Sr. David Kock y su famia.
Durante e bishita, Sr. Kock a brinda un presentacion amplio tocante e concepto innovador cu ta combina vinicultura adapta pa clima local, y un chicken farm sostenibel. E proyecto ta un mixto di creatividad, persistencia y compromiso cu desaroyo local cual a lanta asombro y admiracion den e delegacion Hulandes.
Minister-President Schoof, acompaña pa su delegacion, a expresa su gran impresion riba loke un empresario local por logra cu vision cla y trabou duro. E ta un ehempel tangibel di con un tereno aparentemente limita por bira fuente di produccion, innovacion y inspiracion pa otro.
Minister di Finansa, Asunto Economico y Sector Primario, Geoffrey Wever, a destaca cu e bishita ta pone enfasis riba e capacidad di nos propio pueblo:
“Nos ta orguyoso pa por presenta un proyecto emblematico, cu ta combina sostenibilidad, produccion local y turismo den un solo concepto. Sr. David Kock ta un pionero den nos panorama empresarial y e ta demostra loke ta posibel ora bo kere den bo idea y lucha pa su realisacion.”
Gobierno di Aruba ta satisfecho cu e delegacion Hulandes a por mira di cerca un di e ehempel di resiliencia y innovacion cu Aruba tin pa ofrece. E bishita ta reforza e mensahe cu, den Reino Hulandes, nos por logra hopi si nos traha hunto y si nos lidera cu inspiracion y respet mutuo.
