Cas di Cultura (CDC) ta anuncia oficialmente e mudamento temporal di su auditorio pa Paseo Herencia Ballroom na Palm Beach. E mudamento strategico aki ta sigui e ceramento recien y inespera di e auditorio principal di CDC debi na problemanan structural cu a acelera esfuersonan di renobacion y mudansa plania anteriormente.
Un acuerdo a wordo firma formalmente entre Stichting Schouwburg Aruba (Cas di Cultura) y Paseo Herencia, representa pa Valerie Pietersz-Camacho, Gerente General, confirmando cu CDC lo opera for di e Paseo Herencia Ballroom pa un periodo di mas o ménos dos aña mientras cu renobacionnan y refuerso di seguridad ta wordo realisa na su sitio original.
Mientras cu e espacio di auditorio lo cambia temporalmente pa e luga nobo, CDC su foyer, café, oficinanan y expo zaal lo keda operacional na e localidad original di CDC, siguiendo servicio na e comunidad cu exposicionnan, klasnan y sosten administrativo.
E transicion aki ta sigura cu tur presentacion, producion y evento di tamaño di auditorio lo sigui sin interupcion, cu awor ta organisa na e Paseo Herencia Ballroom, permitiendo CDC pa mantene su programacion y presencia cultural mientras ta duna prioridad na seguridad y sostenibilidad a largo plaso.
“Nos ta gradicido pa e partnership cu Paseo Herencia y pa nan sosten pa haci e transicion aki posibel,” e team di CDC a declara. “Nos compromiso cu e desaroyo di arte y cultura di Aruba ta keda fuerte, y nos ta spera di yama nos publico bon bini na e lugar bunita aki, mientras ta renoba e plataforma principal di cultura, esta nos Cas di Cultura.”
Pa mas informacion y actualisacion por sigui Cas di Cultura riba rednan social of bishita www.casdicultura.aw.
