Diabierna den oranan di madruga pa mas o menos 04:00 am, Atraco Team hunto cu Team di Aresto a haci un entrada hudicial na un cas den Madiki. E detencion ta relaciona cu un caso cu a pasa di un atraco dia 7 mei 2025 na altura di un cas na Palm Beach.
Ta asina cu victima di e atraco a pone un cadena di oro pa bende riba media social. E sospechoso lo a tuma contacto cu e victima pa asina tope na altura di un cas na Palm Beach. Na e sitio menciona e sospechoso a saca un arma di candela y a bay cu e cadena di oro. E victima a bati alarma na Central di Polis pero na yegada di e patruya e sospechoso a bandona e sitio.
Atraco team a wordo poni na altura y mesora a cuminsa cu un investigacion riguroso, na unda awe durante oranan di madruga a haci un entrada hudicial na un cas na Madiki y a detene e sospechoso E.E.N.A. naci na Aruba di 18 aña di edad. E investigacion ta andando ainda y no ta descarta cu lo tin mas detencion durante e dianan nos dilanti.
Cuerpo Policial ta haci un apelacion na e comunidad di Aruba pa paga tino y sea mas cauteloso ora ta bende articulonan riba rednan social. Corda si ta haci cita pa topa e cumprado pa hacie na lugarnan publico y no camindanan bandona, scur etc.
Tambe KPA ta haci un apelacion si bo sa algo of sa algo yama nos tiplijn di polis cu ta 11141. Bo ta keda anonimo. Tur tips ta balioso pa nos pa asi a yuda nos resolve e casonan mas lihe .
