Den un movecion inespera cu a keda anuncia via un notificacion pa prensa, parlamentario Sonali Acosta di AVP a bisa cu e lo retira su mes for di Parlamento di Aruba pa fecha 1 di juni. E motibo? Un oferta di trabou mas lucrativo den gabinete di e mesun gobierno cu e mes a compromete pa controla como parlamentario.
Segun e informacion, Sonali lo bai traha cu Ministro di Asunto Social como sectetaria ehectivo, un funcion cu ta trece casi un dobbel salario compara cu loke un miembro di parlamento ta gana actualmente.
E move aki ta un klap di traicion riba e confianza di pueblo. Pueblo a vota pa Sonali pa representa nan interes den Parlamento – un di e posisionnan mas honra y fundamental den nos sistema democratico. Awe, e ta laga es posicion pa traha cu ministro, un cambio frontal di rol: di “watchdog” pa asistente di e mesun poder ehecutivo cu e tabata supose di controla.
Ta cla: e no ta satisfecho cu su salario actual, ni cu e responsabilidad sagrado di representa e voz di su pueblo. E ta bai pa mas placa. Un hamber pa ganashi personal a usando e compromiso publico.
E accion aki no solamente ta un deseo pa mas salario, pero tambe por wordo mira como un tipo di suicidio politico. Si un hende ta bende su stoel den Parlamento pa un puesto administrativo, kico ta stroba esey pa bolbe sosode den futuro? Y kiko a keda di e “promesa” pa traha pa pueblo?
Na Solo di Pueblo nos ta laga cla: Sonali nunca mas mester bay un campaña electoral. Pasobra si bo por laga un posicion den Parlamento pa un cheque mas grandi, bo no ta digno di e voto di pueblo.
Un gran lamento pa democracia, un oportunidad menos pa nos pueblo, y un alerta pa futuro: wak pa ken bo ta vota.
