E ta zona doloroso, y mas ainda fuerte pa scirbi, cu nos tin hopi homber, pero poco tata.
Tin hopi tata cu no sa, of a lubida, tin di nan ta manipula, of no kier carga nan responsabilidad como tata.
Ta facil pa traha un yiu, pasobra mayoria homber cu drumi cu un muher por traha un yiu, segun e naturalesa cu Dios mes a crea. Si nan ta desea esey y si nan ta completamente bon di salud.
Pasobra ta esey ta e unico forma pa poblacion por multiplica ora un homber y un muher tene relacion sexual cu otro.
Pasobra ta solamente na un homber y un muher Dios a duna e funcion ey.
Awor deber di un tata na prome lugar ta pa Stima su Esposa. ( Efesionan 5;25).
Un tata mester por guia su hogar, Spiritualmente. ( Josue 24:15).
Un tata mester provee pa su Famia ( 1 Timoteo 5:8).
Un tata su deber ta pa comparti sabiduria cu su Famia, especialmente den cos cosnan di Dios, pa asina e por tin un hogar sano y cu respet, norma y balor.( Deutoronomio 6:6-7-8).
E curason di un tata mester ta un curason cu ta pordona, pa asina henter e Famia por tin bon ehempel, di e boluntad di Dios.( Mateo 6:14-15).
E posicion duna pa Dios na un tata no ta negociabel, pesey Dios a pone como cabes di cas.( 1 Corintionan 11:3).
Deber di un tata , ta pa coregi su su yiunan, y no laga cos bay for di man, tuma tempo pa bo hogar, y no duna oportunidad na diabel.( Hebreonan 12:7).
Un tata mester exhorta su famia, den amor di Cristo Hesus, papia cu nan como tata y como amigo, sinta na mesa y dialoga, duna conseho y tuma conseho,pa asina bon comprondemento por reina den cas y un por conseha otro.
Dios no ta yama ningun tata, pa ta spantado di su famia, cu un cara sera constantemente, manteniendo su famia bao di stress cu su comportacion, pensando cu ta asina ey e por controla e asuntonan familiar, esey no ta funciona asina.
Mi yuinan tende instruccion di un tata, y paga atencion pa boso hanja comprondemento.( Proverbionan 4:1).
Un tata mester di yudansa di Dios pa guia su Famia, bo no por guia bo famia segun conseho di amigonan, na trabao of bao di palo , of ora ta dal serbes na chines, esey hopi biaha ta conseho nan carnal, cu no por soluciona ningun problema, pasobra cada cas tin su crus, y a base di e relacion cu e tata tin cu Dios, Dios lo yude guia su famia.
Famia ta algo di hopi balor, y perdida di famia ta haci hopi dolor . Especialmente ora e famia dividi, y e yiu cu bo tabata carga, of cu tabata sinta riba bo pia, of cu tur atardi tabata corre bon duna bo un brasa ora bo yega for di trabao, awor a bira e yiu cu bo tin cu traha afspraak pa papia cune of hasta mire, pasobra bo a neglisha bo famia.
Awor como tata nos tur ta mira cu pa motibo cu hopi tata a neglisha nan deber, e problema social bao di hoben ta grave.
Awor kico ta nos deber como tata, nos no por para keto, tampoco tira falta riba amigo y gobierno.
Nos mester acudi serca Dios, pasobra ta Dios a duna nos e autoridad pa bira tata, pesey den tur situacion nos mester consulta cu Dios. ( 2 Cronicas 7:14).
Awor mas cu nunca tur tata mester aserca e trono di gracia di Dios.
Sinceramente, Pastor Marcel Balootje
