No tin nada mas bunita, grandi y poderoso, ora un homber ta edifica su cas cu palabra di sabiduria.
Locual un hende papia cu su boca esey e ta cosecha, ta manera un hende ta pensa asina e ta.
Si un hende ta murmura constantemente, no ta contra su famia e ta murmura, pero ta contra Dios e ta murmura, y nos tur sa cu tur hende cu kier bay contra Dios su Palabra ta sali perdi.
Ta solamente cu Dios nos por gana nos batayanan, pega den Cristo Hesus nos tin gran refugio, leu for di Cristo Hesus, nos ta manera a rama kibra for di e mata cu ta seca cada dia.
Tur cos ta drecha ora e tata cu Dios a pone como cabes di cas cambia su vocabulario, asina su bida ta cambia, su famia lo cambia, y su hogar lo sali pa dilanti.
Pasobra tin cosnan cu ta solamente cu yudansa di Dios nan por drecha.
Hopi biaha algo ta pasa den cas, cu nos yuinan, of cu nos mes, cu Dios ta permiti pa hala nos atencion como mayornan, cual ta demostra cu nos ta esun prome cu mester trece cambio den nos hogar, Stop di zundra,
Stop di manipula,
Stop cu abuso,
Stop di bebe,
Stop di droga,
Kibra cu e bida di tin varios muher siendo un persona casa,
Tuma tempo pa bo hogar,
Tuma tempo pa bo yuinan,
Papia palabra drechi, palabra cu ta edifica, y ta duna crecemento.
Locual Bijbel ta sinja nos no ta solamente pa un grupito pero pa tur esnan cu ta kere den Dios.
Ora bondad wordo papia den cas, bondad ta permanece den cas.y riba nos yuinan.
Cu Senjor bendicionabo y warda bo.
Cu Senjor haci Su cara resplandece riba bo.
Y tene misericordia di bo.
Cu Senjor halsa Su cara riba bo y duna bo pas. ( Numbernan 6;24-26 ).
Asina nos mester bendiciona nos yuinan y Dios tambe lo bendiciona nan.
Henter dia ora nos yuinan ta riba caya na scol of cualquier otro caminda nan ta tende cosnan negativo, cos nan cu ta danja mucha, cosnan cu ta haci mucha rebelde, hasta tin biaha nuchanan ta cana cu mal amistad, pero ora un mucha yega su cas, e tin cu tende cosnan diferente y ambiente diferente,palabra nan cu ta duna gana di biba pa mira e grandesa di Senjor.
Wak bon kico e palabra di Dios ta bisa den Efesionan 3:16-17: Pa e motibo aki mi ta dobla mi rudia dilanti di E tata, di Kende henter e Famia, den cielo y riba terata hanja su nomber.Pa e concede boso, conforme e rikesa di Su gloria, pa wordo fortalese cu poder pa medio di Su Spirito,den e hende interior, pa asina Cristo por biba den boso curason, pa medio di Fe,y pa boso teniendo rais bon pega y funda den amor.
Amor ta e punto di contacto den tur famia, y no placa, placa no por cura dolor di hende, placa ta temporal, pero palabra di Dios ta eterno.
Amor y pordon ta pone nos wordo reconoci como yuinan di Dios, amor y pordon ta lanta curason di nos mes y nos yuinan, y ta uni nos pa sigi bay dilanti, y haci nos fuerte pa enfrenta tur cos.
Laga nos como tata , nunca entrega riba nos yuinan, corda locual tin scirbi den Lucas 15:20-24.
1 Cronicanan 28:9 David ta bisa; Pa loke ta abo, mi yiu Salomon, conoce e Dios di bo tata y sirbie cu henter bo curason, y cu un alma boluntario.
Sinceramente, Pastor Marcel Balootje
