Diahuebs mainta, Prome Minister mr. Mike Eman, acompaña pa representantenan di FCCA, DOW, Serlimar, Bureau City Inspector y GKMB, a tene e di dos edicion di “Accion di Bario”. E biaha aki, Accion di Bario a tuma luga na Bushiri Complex cu durante di e ultimo añanan a keda totalmente neglisha.
Desde cu a cera e dump na Parkietenbos algun tempo atras sin tin un plan cla pa atende cu e retonan cu esaki lo a trece cu ne, hopi famia humilde a opta pa acumula desperdicio den cura di cas te ora haya manera pa paga pa busca un baki di sushi pa deshaci di esakinan. Esaki ta trece problemanan serio di higiena den areanan habita cu por ta un peliger pa e habitantenan mes.
Gabinete AVP-Futuro, cu e compromiso profundo pa mehora e bienestar di cada ciudadano y e calidad di bida di nos comunidad, ta mira e necesidad pa duna un man, den forma strucutura, pa deshaci di e problema di desperdicio den barionan. Apenas algun dia atras, a tene e accion di “Baki den Bario” den districto di San Nicolas, cu a duna un bista real di e situation di desperdicio na Aruba. Esaki tabata e caso tambe den Semeleerstraat na Noord, unda cu a topa cu un cantidad enorme di desperdicio acumula den curanan di cas di esnan cu no tin manera pa paga e gasto exorbitante di servicio di deshaci di sushi.
“E bon comun nos mester pone nos dilanti caminda nos ta bay sirbi e interes, balor y cuido di cada un di nos ciudadanonan y specialmente e barionan cu tin reto”, Prome Minister Eman a subraya.
Accion di Bario ta un proyecto di Gabinete AVP-Futuro cu structuralmente lo pasa den tur districto y duna un man na esnan mas den necesidad. Ademas e ta sirbi e proposito pa stimula e habitantenan di cada bario pa yuda mantene nan cayanan limpi y organisa. Limpiesa di nos barionan ta un responsabilidad colectivo y ta hunto nos por tin un Aruba limpi, cu ta dushi pa biba.
