Den e Evangelio di awe Hesus ta mustra nos con nos tin cu anda cu nos ruman cu ta hibando un bida pecaminoso. E ta duna e ’metodo di coreccion’ cu ta consisti di 3 stap. E coreccion fraternal aki por ta dificil pa haci pero nos ta yama pa busca nos ruman, e pecador y hala su atencion bek pa e amor incondicional di Dios. E reconciliacion cu Dios ta e focus constant di nos bida comunitario cristian. Hunto nos ta yuda otro keda riba e caminda of haya e caminda bek den pasonan di Hesus. E motivacion pa haci esaki si mester ta bon cla pa nos: e unico meta ta pa e pecador encontra Hesus atrobe, pa e por sinti e amor incondicional di nos bon Dios. Nos no por tin motivacion di alteracion manera vengansa of resentimiento, ni maske ta contra nos mes e ruman a peca. Nos mester corda semper cu na momento di corigi e otro, Hesus ta nos modelo den su acercamento na pecadornan: con El a trata e muhe Samaritana, e muhe adultera, of e cobrado di belasting? Y nos mes? Hesus semper ta amabel, gentil y yen di compasion.
Oracion: Señor Hesus, haci nos curason manso y humilde manera esun di Bo. Y duna nos curashi y sabiduria ora di corigi otro. Amen.
