Minister di Finansa, Asunto Economico y Sector Primario, mr. Geoffrey Wever, hunto cu e director di Santa Rosa, representantenan di United Farmers of Aruba y Cunukero Uni, a presenta na Parlamento di Aruba e vision y plan integral pa desaroyo di un sector agricola comercial, moderno y sostenibel na Aruba. E presentacion tabata enfoca riba desaroya e sector den un manera structural, crea oportunidad pa cunukeronan, y contribui na diversificacion economico di Aruba.
Durante e encuentro, Minister Wever a splica cu e plan pa establece un Agri Innovation Park (AIP) ta un pilar esencial den e vision y strategia di Gobierno. E Agri Innovation Park lo sirbi como un hub pa produccion agricola moderno, cu infrastructura tecnico, facilidadnan comparti, y un modelo cu por replica den diferente area na Aruba. E parke lo ofrece tereno pa huur, infrastructura di suministro di coriente y sistema di irigacion, infrastructura pa procesa y warda productonan, y guia cu ta permiti e cunukeronan concentra riba produccion y innovacion.
Minister Wever a señala cu Aruba ya a cuminsa cu e trabounan preparatorio pa e Agri Innovation Park. Un estudio inicial di Priva, un institucion global den agricultura inteligente, a mustra cu e Agri Innovation Park tin e potencial pa genera 110 millon florin den actividad economico y 400 cupo di trabou. E blueprint tecnico y financiero ta den desaroyo y tin como meta pa keda cla, 1 februari 2026, despues di cual por cuminsa cu e fase di construccion.
Minister Wever a destaca cu e Gobierno ta asumi su responsabilidad pa crea e condicionnan – infrastructura, ley y regulacion – pa duna cunukeron un tereno sigur riba cual nan por inverti cu confiansa. “Mi ta convenci cu e Agri Innovation Park lo ta e inicio di un Sector Agricola Comercial, e inicio di un pilar economico nobo”, segun Minister Wever. Pa yuda e cunukeron actual y motiva esunnan nobo, Gobierno a establece un AgriFund hunto cu Qredits, den cual ya a inverti 1.2 miyon florin y a crea hunto un fondo di 3 miyon florin. E fondo ta ofrece prestamo cu interes abou (2%) pa cumpra ekipo, instala panel solar, y inverti den e operacion agricola. Awo tin ya 1.4 miyon florin duna na prestamo y tin ainda mas o menos 1.6 miyon florin disponibel pa prestamo nobo.
“E sector agricola no ta un soño, pero un elemento real di nos futuro economico.”
Na final, Minister Wever a conclui splicando cu e ambicion di gobierno ta pa lanta un modelo di agricultura moderno, sostenibel, y cu ta agrega balor real na e GDP di Aruba, sin perde di bista un balansa entre sostenibilidad, disponibilidad di producto local y di loke ta realisabel pa un isla chikito.
