Den ambiente di union, color, ritmo y orguyo cultural; a tuma luga na Plaza Libertador Betico Croes, e celebracion di e 20 aniversario di nos Encuentro Multicultural Aruba y e Prome Lustro di celebracion local di Dia Mundial di Diversidad Cultural pa Dialogo y Desaroyo, declara oficialmente pa UNESCO.
E celebracion a tuma luga dia 17 di mei 2025 den forma di un evento vibrante y yen di sabor: un Feria Gastronomico y Show Multicultural y tambe un anochi di reflexion y gratitud cual a tuma luga dia 21 di mei den John F. Kennedy Education Center na tur grupo, organizacion cu a participa.
E celebracion di dia 17 a habri cu un presentacion vibrante di Alma Gitana, interpreta pa Angela Baides di España, cu a toca nos curazonnan cu un ritmo sincero y autentico. E entrada di Bandera, representa pa tur grupo participante y acompaña pa e energetico El Duque Victor Samuel (España), a duna tono solemne y un sentimento di union. Seguidamente, nos Himno Nacional “Aruba Dushi Tera” a wordo canta hopi emocionante pa Afro Tambor Venezuela, cu a habri e anochi den estilo grandioso.
Durante e feria multicultural, nos pueblo a disfruta di presentacion di mas cu 30 grupo cultural y cu participacion di mas cu 300 artista, representando un mosaico rico y varia di e pais y comunidadnan cu ta forma parti di e alma di Aruba.
Pa nombra algun:
Grupo di Baile Dabaruida & Fundacion Rosea Cultural Aruba. Gucci Dancer’s Aruba. Comunidad Wayuu (Colombia-Venezuela). Grupo Niti Gupta (India). Grupo Cultural di Filipinas. Vallenato Plus (Colombia). Curacao Uni (Curaçao). Club di Movimiento y Empower Arts Aruba. Fundacion Petronio Alvarez Internacional (Colombia). Takiri Peru Folk Danzarte (Peru). Las Quisqueyanas (Rep. Dominicana). Fundacion Drecca (Colombia). Mariachi Reyes di Aruba – Ernan Angela (Mexico) y hopi otro grupo cu ta representa paisnan como Brazil, Cuba, Bonaire, Portugal, Republica Dominicana y nos mes Aruba multicultural.
E nivel di entrega, talento y dedicacion cu cada grupo a trece, a haci e nochi aki uno inolvidabel. Esaki ta evidencia claro di un compromiso colectivo pa crea union y comprension den nos comunidad, uzando e poder di arte, danza, musica y cultura.
DCA ta sumamente agradecido na cada grupo, fundacion, artista y voluntario cu a pone nan curazon riba e tarima y den e preparacion pa e evento.
Danki na tur esnan cu a forma parti di e Feria Gastronomico compartiendo e cuminda, cos dushi y artesania di varios pais.
Un danki den special na Cuerpo Consular, tur Grupo Participante Estableci aki na Aruba. DCA, Seccion di Implementacion y Finansa di DCA, tecniconan y boluntarionan: Roland Jansen, Lupita Bernabela, Suhaila Alders, Angela Velazco y tambe na Cuerpo di Polis, Directie Buitenlandse Betrekkingen, Departamento di Relaciones Exteriores, DOW, Serlimar, DTI, Brandweer Aruba, John F. Kennedy Education Center, Cas di Cultura Aruba y High Performance cu tabata encarga cu zonido y luz.
Pa honra e esfuerzo, Departamento di Cultura Aruba a dedica e anochi di 21 di mei 2025 exclusivamente pa reconocimento y reflexion, a entrega certificado di gratitud y participacion na tur participante den un ceremonia intimo den John F. Kennedy Education Center.
E lema di UNESCO – “Diversidad Cultural ta un forza pa desaroyo y dialogo”, ta mas cu palabra: Aruba a demostra cu ta posibel pa convivi, siña y celebra hunto.
Nos isla ta un testimonio bibo di convivencia multicultural y esaki ta algo cu nos mester proteha y stima.
Den luna di September di 2025 na Aruba Art Fair lo tene e Tradicional Parada Multicultural y den otro comunicado nos lo anuncia un fecha di evaluacion cu tur participante y lo lansa e Inscripcion Oficial pa e di 21 aña, sperando di por conta cu participacion di mas pais.
Departamento di Cultura Aruba ta compromete pa sigui duna espacio, apoyo y visibilidad na cada expresion cultural den nos comunidad, grandi of chikito, tradicional of moderno. Ban sigui celebra nos identidad hunto.
