AVP TA PASA LIÑA: Fraccion di AVP metiendo man den asuntonan di Ministerio Publico

Expertonan huridico ta cuestiona e “yamada formal” di AVP na Ministerio Publico, alertando cu e ta viola e independencia di poder hudicial. dor di interferencia politico

Den un declaracion recien, e fraccion parlamentario di Partido di Pueblo Arubano (AVP) a haci un “yamada cla y formal” na Ministerio Publico (MP) pa actua di manera “rapido, transparente y husto” den casonan legal cu ta afectando e pais. Sinembargo, e declaracion aki a worde critica como un metemento peligroso den e independencia di MP, violando e principio sagrado di Trias Politica(separacion di poder).

Presion politico disfrasa di “precupacion”?

Fraccion dj AVP, den su comunicado di 12 di juni, a expresa solidaridad cu su colega Mike de Meza, kende ta enfrenta investigacion fiscal y legal. Pero loke a cuminsa como un mensahe di apoyo a termina den un exigencia directo na MP, un organo cu, segun ley, mester opera sin influencia di otro podernan di Estado.

E fragmento mas polemico ta bisa:

“Den mesun rosea ta haci un yamada cla y formal na Ministerio Publico pa conduci su investigacion di un manera rapido, transparente y husto.”

Pakico esaki ta problematico?

Parlamento no tin autoridad pa duna instruccion, ni tampoco haci “yamada formal”, na MP.

Ministerio Publiclo mester actua cu total independencia, sin presion di partidonan politico, pa garantisa husticia imparcial.

Si Ministerio Publico acelera of cambia procesonan debi na presion politico, ta hinca e Estado di derecho den peliger.

Expertonan ta reacciona: “Esey ta un linea cu no mester crusa”

Un reconocido hursita, kedando anonimo a comenta na Solo di Pueblo:
“MP no ta un extension di Parlamento. Un ‘yamada formal’ di un partido politico por wordo interpreta como un ordo indirecto. Si AVP kier transparencia, nan mester respeta e tempo y autonomia di husticia, no pidi cambionan segun nan conveniencia.”

Un analista politico a señala:
“Ta hipocrita papia di ‘Trias Politica’ y na mesun tempo haci presion riba MP. Si AVP ta kede den institucionnan, nan mester laga MP traha sin insinua con mester haci su trabou.”

Doble standard di AVP?

E mesun partido cu den pasado a grita “interferencia den husticia” awor ta parce ta ripiti e wega cu nan tabata critica tanto. Na 2023, AVP a condena e gobierno di turno pa “influencia investigacionnan”. Awor, acaso nan ta cai den e mesun practica ?

AVP por argumenta cu nan ta busca “husticia rapido”, pero ora nan dirigi nan mes directamente na MP, nan ta cruza un linea delicado. Den un democracia saludabel, e Parlamento ta legisla, Gobierno ta ehectua y MP ta investiga sin interferencia. Si partidonan ta cuminsa dicta ritmo of metodo na poder hudicial, esey ta metemento o pone presion.