Departamento di Cultura Aruba (DCA) ta prepara pa un celebracion di San Juan – Dera Gay 2025 diferente, inspiracional y educativo. E aña aki, e proyecto ta keda den tema: “Planta awe pa Cosecha mayan”, caminda e enfoke lo ta riba plantacion, cosecha y educacion ambiental, sin perde di bista nos rico tradicion folklorico.
San Juan – Dera Gay ta un tradicion cu nos pueblo a conserva y celebra pa generacionnan, y cada aña DCA ta contribui pa stimula conocemento cultural y participacion den e comunidad escolar. Pa 2025, e enfoke ta mas amplio: e mezcla di tradicion cu sosten y educacion ta forma e base di un proyecto nobo, pa mucha entre 6 y 12 aña, cu lo combina educacion, planta y celebra.
E proyecto lo inclui:
- Un baki di plantacion pa scolnan basico;
- Herment y simia pa planta y cuida mata;
- Un wega cultural (bordspel) y booklet informativo;
- Instruccion y guia educativo riba “agroforesteria’;
Otro aña e scol cu e miho hofi lo gana e Trofeo di Gay 2026.
Departamento di Cultura lo realiza e proyecto den colaboracion cu un grupo di partner local, incluyendo Living Soil Aruba, Santa Rosa – DLVV, EPI Aruba, y otro entidadnan cu ta yuda brinda experiencia, material y guia pa logra e meta educativo y cultural.
E idea principal di e proyecto ta cla: Sembrando un base di consciencia, creatividad y sosten cultural den nos comunidad, pa nos por cosecha un futuro cu orguyo, conocimento y respet pa nos tera.
E siman di San Juan lo inclui reparticion di material, bishita escolar, y video educativo cu lo wordo transmiti via Telearuba y riba e medionan social di DCA.
Proximamente Departamento di Cultura lo sigui comparti mas informacion di e proyecto aki.
Tambe den e siman venidero keda pendiente pa e agenda cultural di e actividadnan planea di “Dera Gay” den e barionan manera ta custumber tur aña.
