E siman aki ta marca un momento significativo pa turismo di crucero na Aruba. Den colaboracion cu Aruba Ports Authority (APA), Aruba Tourism Authority (ATA) y Florida & Caribbean Cruise Association (FCCA), Aruba a tene e prestigioso PAMAC Conference 2025 riba nos isla. E conferencia, cu ta reuni lidernan principal di e industria di crucero na Caribe, a regresa Aruba despues di 8 aña, treciendo cu ne un oportunidad valioso pa eleva e posicion di Aruba den e mapa global di crucero.
Parlamentario Jennifer Arends-Reyes, den su rol como presidente di e comision parlamentario di turismo, tabata invita pa participa den e prome anochi oficial di e encuentro, caminda el a tene dialogo directo cu e ehecutivonan mas influyente di e industria. “Encuentro manera PAMAC (Platinum Associate Membership Advisory Council) Conference ta oportunidad unico pa lanta un dialogo strategico, caminda Aruba por expresa su vision, deseo y desaroyo actual den e sector,” Arends-Reyes a expresa.
Durante e e conferencia, Aruba a presenta su progreso den infrastructura portuario, incluyendo e dredging cu a tuma luga den pasado pa por ricibi barco mas grandi y moderno. “Pa hopi aña nos a pone nos meta: pa yega na 800 mil pasaheronan di crucero pa aña y a yega te pase. Awe nos por wak bek cu orguyo riba esey como un logro grandi di turismo na Aruba, awor ta toca turno na stabilisa esaki y keda enfoca.
Aruba ta sigui traha riba diversificacion di su oferta pa barconan, enfocando no solamente riba mega-cruises, pero tambe riba barconan mas chikito, yatenan exclusivo y luhoso manera entre otro Ritz Carlton Yachts. “Esey ta mustra cu Aruba ta adapta y innova, sin perde di bista nos compromiso cu sostenibilidad y calidad pa tur huesped,” segun Arends-Reyes.
E feedback ricibi durante PAMAC Conference 2025 ta confirma su exito rotundo. Huespednan, entre nan ehecutivonan di nivel halto, a expresa nan satisfaccion e hospitalidad y organisacion cu Aruba ta brinda. “Nos por sigui sinti nos confia cu Aruba ta keda un destinacion preferi den itinerarionan di crucero den Caribe,” Arends-Reyes a conclui.
E comision di turismo lo sigui traha di cerca cu APA, ATA y e sector priva pa asina fortalece posicion di Aruba den e futuro turistico di crucero.
