No ta cos di awe, pero ta cos cu tin siglonan ta sosode, cu hende ta gusta scuridad, nan kier mantene amistad cu diabel, nan ta inverti tempo y placa den maldad, sperando beneficio, pero semper ta termina na malo y cu hasta e posibilidad cu nan alma ta bay perdi.
Hende pa falta di conocemento,of rebeldia, ta hinca nan mes den trampa di diabel, y nan ta wordo ganja caminda nan ta pasa tur nan confiansa pa scuridad.
Hende cu nan cas ta dedica na bruheria.
Nan matrimonio ta dedica na bruheria.
E posicion den nan trabao ta obra di bruheria.
Nan ta kibra bida di otro pa medio di bruheria.
Nan ta sacrifica nan propio yiu of esposo, pa beneficio di bruheria.
Nan auto ta dedica na bruheria.
Cada rato nan tin cu renoba nan pacto cu bruheria, pasobra sino haci esey, e diabel lo cobra.
Awor pakico haci tanto maldad , pakico hinca nos curpa den tanto dolor di cabes, si e palabra di Dios ta bisa: Cu tur cos ta posibel si bo tin Fe, y cu Fe ta Poderoso y cu Fe ta move man di Dios.
Dios a crea cielo , tera y laman y tur locual tin den dje, bao di dje y riba dje, y un palabra ta para scirbi, cu Dios a duna tur autoridad na Cristo Hesus, y cu Cristo Hesus a pasa e autoridad ey na tur esnan cu ta kere firmemente den Su nomber. Pesey e palabra di Dios ta bisa cu den Su nomber nos lo saca demonjo, y nos lo trapa riba colebra y scorpion.
Palabra di Dios ta bisa tambe cu E ta sostene y ta move huntu cu nos.
Pero su Palabra no ta cambia, pasobra tur rudia mester dobla y tur lenga mester confesa cu Cristo ta Senjor pa gloria di Dios tata.
Hopi biaha nos ta culpa hobennan pa nan comportacion, sin sa con diep nan mayornan ta den bruheria, y con nan mayornan ta obliga pa nan tambe participa, y tin mayornan ta ofrece sin ningun clase di escrupulo nan yuinan na diabel pa beneficio economico, y grandesa di mundo, y despues ora e enmigo kita bida di e mucha, of e mucha bay perdi den inmoralidad, y malicia di mundo nan kier tira e falta riba sociedad.
Mayornan tene cuenta cu maldad a aumenta gravemente, y maldad tambe ta bira moderno.
Antes bo tabata bishita un bruho den un casita, awor bruheria to move den oficina moderno y luhoso.
Antes bruheria tabata scondi awor aki tin tienda di bruheria y maldad.
Tene cuenta cu awor aki tin musica di Rock y Rap cu verso diabolico, y hobennan cu ta scucha e cosnan ey, nan mente ta bruha, nan ta cuminsa manipula, intimida, y hasta kier domina henter cas, pasobra locual nan ta scucha constant, esey ta domina nan mente y nan bida,
No ta tur biaha ta droga y alcohol so ta causa danjo, pero e bruheria a avansa, den musica, telefon,y facebook.
Peliculanan di bruheria y terror a bira un custumber, ta parce manera hende a lubida cu Dios tin poder pa destrui tur plan di enemigo.( Efesionan 6:10-18).
Nan ta lubida cu Cristo Hesus a bini pa caba cu e plannan di diabel. Ta pesey den Su nomber tin poder pa cancela tur clase di maldad diabolico.
Rebeldia ta manera pica di bruheria, y capricho ta manera inikidad y idolatria. ( 1 Samuel 15:23).
Ban mantene Cristo Hesus na prome lugar den nos bida, pasobra Cristo Hesus ta nos unico refugio.
Sinceramente, Pastor Marcel Balootje
