Despues di ta 4 luna na Venezuela riba 3 di juli e tres piscadornan Arubiano, Reangelo E. Stamper (Angelo), Franklin G. Vos (Frank) y Alberto R. Laveist (Robert), a jega Aruba bek. Ora nan a pensa cu e mala racha cu nan a pasa dor di dje na Venezuela a caba nan a cuminsa haya jamada y messagenan cu menasanan di morto y hende cu ta purba di saca placa di nan. Nan a purba di hasi denuncia pero te awor recherche no a tuma nan denuncia, aunke e messagenan riba whastapp y facebook ta papia pa nan mes. Pa e motibo ey y pa no tin ningun storia cu no ta cuadra cu berdad nan a dicidi di pa ultimo biaha conta pueblo di Aruba kiko a pasa e dia cu Pau Martijn a desparece.
Mainta trempan Angelo a baha e boto “Gislaine” na Savaneta. Eyan Pau tabata wardando riba dje pa nan sali bai pisca. Di eyan a bai Zeerover pa cumpra saki ijs y awa. Di eyan a sali pa direcion di cabes di Aruba. Ora jega cabes di Aruba a cuminsa baha e rosarionan pa cuminsa e slipmento di pisca. A core basta ora na cabes di Aruba.
Banda di 11 or a bai na pier di Rodgers beach pa busca Frank y Alex van der Berg. Manera un dia prome a wordo acorda lo buscanan eynan ora nan a caba di traha. Ora jega pier nan tabata tey caba. Na pier a cuminsa controla equiponan di dive. Di eynan a bai bek lama direcion Baho, un punto conoci entre Aruba y Venezuela cu ta den awanan international. Ora jega Baho a cuminsa prepara lineanan y bolbe baha rosarionan pa slip picuda. Eynan a keda un paar di ora.
Un poco depues di 1 or a subi e rosarionan y saca lineanan foi awe y Pau a cuminsa prepara pa su prome dive. Pau a baha y e a hasi e senjal cu tur cos ta ok y cu e por bai fondo. Eynan a cuminsa tuma si tempo, cu ta 90 minuut, locual un dive di 2 tanki ta dura. Eynan a keda stationa na e boei. E ora Angelo a cuminsa prepara su equiponan pa free dive. Angelo a baha na mes un caminda unda Pau a baha pa cuminsa tira pisca. Esey a sali cu no tabata posible pasobra e stroming tabata basta duro. Angelo a hasi senja na Frank pa bin sac’e fio di awa. Ora nan lanta Angelo e bisa cu e stroming ariba ta demasiado duro y no lo baha mas pa free dive y lo warda riba Pau. A stationa na e boei bek y spera e tempo pa Pau subi. Despues di 90 min Pau a subi y a hise den boto. Pau a bisa cu e no a logra tira mucho cos paso e stroming mas abou den lamar tambe tabata basta duro. A dicidi bolbe baha rosarionan y bolbe slip. Pau a dicidi di sosega e ora tempo ce mester pa e decompress.
Despues algo mas cu un ora Pau e lanta di sonjo y Frank a jude pa pone su equiponan di nobo. A lanta e rosarionan bek foi di awa y bai bek direcion di boei. Eyan Pau a baha bek cu dos tanki algo despues di 4 or. Despues un rato Angelo a bai den awa cu su equipo di free dive pa check cu tur cos ta ok cu Pau. A wak Pau den fondo cu a caba di tira un pisca. Angelo a subi bek den boto. A bai bek y stationa na e boei pa tin miho bista pa ora Pau ta subi. Asina a keda warda pa Pau subi. E ora a jega pa Pau subi, pero e no a subi. Angelo bolbe bai den awa pa wak kiko a pasa y dicon Pau no subi. E no a wak Pau, pero si a wak su harpon personal den fondo di lamar. Angelo a subi bek den boto. Ora kier jama tera e telefon satelital no tabata den su caha. Solamente e celular personal di Pau, su bril y su cartera tabata aden.
A cuminsa hasi buskeda rond di boei pero no haya ningun senjal di Pau. Ora a cuminsa bira scur y gasoline a cuminsa caba a dicidi di jega mas serca di Aruba pa haya contact cu autoridadnan via telefoon normal. Angelo a jama A.P.A. y eynan buskeda di autoridadnan a cuminsa. A jega tera na Rodgers beach pa tank y nan kier a bai bek. Na prome instante polis no tabata kier a laga nan bai bek, pero despeus un rato tog laga nan sali bek y solamenta Alex a keda tera na e momento ey. Finalmente a jega tera bek banda di 3.00 diadomingo mainta y a bai sosega un rato.
Despues cu e noticoa a sali cu Pau tabata perdi mes un diasabra anochi Robert tambe a sali buska Pau riba lamar cu su boto. Diadomingo mainta banda di 8 or e a bai buska Angelo pa sigue cu e buskedad. Hunto cu Frank a subi lamar bek.
Dialuna mardruga 3 or nan a jega pier di Zeerover sin haya Pau. Frank y Angelo a bai sosega pa sali bek mas lat y Robert a keda na pier. Dado momento a drenta un jamada di Colombia na e celular di un señora cu Robert conoce como señora
Rosita, cu ta ruman muhe di Pau. Aparentamente nan a bis’e cu nan a localisa Pau y e ta den mangrove pega na costa di Castelletes na Colombia. Eynan e casa di Pau a suplica Robert pa jud’e y sali bai buska Pau. Robert a puntra ken a duna e informacion. Señora Rosita a bisa cu un hende di search y rescue na Colombia a haya senjal di e telefono satelite di Pau y cu e senjal ta moviendo, pero na Colombia nan no lo sali prome cu 9 or di mainta pasobra lamar ta hopi bruto. Mas hende na pier cuminsa pidi Robert pa bai. Robert a bisa mester papel di ZARPE pa por sali y pasa den awanan di Venezuela. Via Wilfred Martijn a haya contact cu minister Bikker y pa 5.30 or minister a jama na celular di Wilfred Martijn y bis’e cu por pasa Barcardera pasobra tur cos ta regla pa por sali.
A contact Angelo y Franklin pa bin y a bai Barcadera pa klaar uit y nan a sali rumbo Castelletes, Colombia. A hasi buskeda di Punta Spada, pasando costa completa di la Guaijra te cu jega na cuminsamento di Castalletes, te cu a jega na punto na unda a wordo detecta e senjal. Tabatin contact continuo cu e base di Guarda Costa Venezolano na frontera entre Venezuela y Colombia banda di los Monjes na Colombia. Lama a bira mahos y a pidi pa manda un guia pa juda nan jega tera. A jega un boto chikito cu dos persona cu a puntra si nan ta e hende di Aruba cu ta buscando un amigo perdi. Nan a confirma esey y nan a bisa pa sigi nan pa jega tera.
Ora di jega tera, pensando cu a jega na Colombia, nan a wordo hiba na un pier. Eynan a topa cu un tal señor Jose cu tabatin contact cu famia di Pau y tambe cu señor Eric Mansur. Señor Jose a conta nan cu Pau a wordo haya na Punta Spada, pero ora e a jega hospital di Rio Hacha e lo a fayece. Nan a puntra ki ora Pau a wordo haya y a haya como contesta cu 2.30 di merdia. Nan a haya esey un poco stranjo y a puntra si nan por haya confirmacion di esey. Sr. Jose a jama Eric Mansur cu su celular y señor Mansur a confirma na Robert cu en berdad Pau a wordo localisa, pero cu e a fayece na Rio Hacha y cu su sobrino, Andrew Martijn, lo bin Colombia cu avion pa reconoce e curpa. E ora nan a wordo bisa pa nan laga e boto atras cu señor Jose y nan lo wordo hiba na Colombia via mondi pa asina bin bek hunto cu e curpa di Pau den avion.
Despues di esey Guardia Nacional di Venezuela a jega riba nan y e ora ey a compronde cu no ta na Colombia nan ta, pero na Venezuela. E momento ey nan a wordo deteni y eynan un caminda di cruz di 4 luna di intertidumbre a cuminsa cu a finaliza dia 3 di juli ora por a jega bek Aruba.
Reangelo E. Stamper,
Franklin G. Vos
Alexzander Junior van den Berg
Alberto Roberto Laveist
