Den un gesto di union y compasion, diabierna 20 juni, a ilumina Bestuurskantoor cu color blauw anochi pa conmemora Dia Mundial di Refugiado 2025, uniendo cu varios sitio iconico rond mundo pa honra e forsa, determinacion y derecho di refugiadonan. Ta celebra Dia Mundial di Refugiado mundialmente riba 20 di juni, pa honra e balentia di hendenan cu a wordo obliga pa hui y ta reconoce nan derecho na siguridad, dignidad y oportunidad.
E iluminacion di Bestuurskantoor ta sirbi como un simbolo visibel di solidaridad di Aruba cu mas di 120 miyon di hende rond mundo cu tin cu hui for di nan cas pa motibo di conflicto, persecucion y crisis climatico. E acto aki tambe ta refleha e compromiso continuo di e isla pa crea un sociedad cordial y inclusivo pa migrantenan forsa pa bandona nan pais.
E conmemoracion e aña aki, organisa pa United Nations High Commissioner for Refugees (UNHCR) den colaboracion cu Gobierno di Aruba, a uni funcionarionan gubernamental, sociedad civil, partnernan social internacional y representante di refugiadonan bao di tema di solidaridad, inclusion y humanidad comparti.
E programa, teni na oficina principal di Gobierno na Oranjestad, a conta cu un discurso di Irene van Rij, Hefe di oficina di UNHCR na Aruba, cu a enfatisa riba e importancia pa para hunto cu refugiadonan y di reconoce nan potencial y contribucion. “Dia Mundial di Refugiaonan no ta solamente un momento di conmemoracion, e ta un yamada pa accion,” van Rij a bisa den su discurso. “E luz blauw riba nos Bestuurskantoor anochi ta un muestra di speransa y un recordatorio cu Aruba ta para cu refugiadonan.”
E evento tabatin un historia inspirado di integracion comparti pa Raquel Lampe, Director di Colegio Filomena (Ciclo Basico), y un discurso di Minister di Salubridad Publico drs. Mervin Wyatt-Ras.
Raquel Lampe e conta e storia inspirado di Angel, un hoben cu a bin Aruba cu 8 aña y cu a mira e oportunidad den un pais nobo pa progresa. Apesar di tur e retonan cu e hoben tabata enfrenta tur dia, leu for di pais di origen, leu di su mayornan y den un pais nobo, idioma y custumbernan desconoci, e hoben aki, 10 aña despues di a yega Aruba, a gradua na Colegio Filomena como e miho graduado cu puntonan excelente. Esey ta determinacion y resilencia.
Segun Minister Wyatt-Ras “E luz blauw cu ta briya anochi no ta solamente un simbolo di UNHCR. E ta un luz cu ta recorda nos ken nos ta y ken nos ta yama pa bira: un sociedad cu no ta bira su cara pa sufrimento, un gobierno cu ta defende dignidad y husticia, un pueblo cu ta kere den e Bon Comun, no solamente pa nos mes, pero pa tur esnan cu ta busca siguridad riba nos costa.”
“Mientras cu nos ta ilumina simbolicamente e edificio di gobierno na color blauw, laga e luz ilumina algo mas profundo den nos mes: nos consciencia, nos compasion y nos compromiso cu dignidad humano”, Minister Wyatt-Ras a expresa.
E apoyo continuo di Aruba y su politica inclusivo, specialmente pa Venezolanonan cori for di nan pais, a demostra e liderazgo di e isla den proteccion y integracion di refugiadonan.
