No papia malo contra bo mes, ni contra ningun hende, no descurasha bo mes, no husa bo boca contra bo mes, tampoco desea malo pa otro hende, pero laga tur locual bo ta papia tin forsa pa pusha bo mes, esforsa bo mes y otronan pa bay dilanti.
Ora bo ta papia den bo cas, husa e palabra nos, e palabra nos ta simbolo di union spiritual y social, e palabra nos ta demostra bo interes den bienestar di otronan:
Por ehempel nos ta prepara pa bay cu vacantie,
Nos tur ta lanta tempran mainta, y nos ta zorg pa yega Iglesia, Misa, Snoa of Tempel na tempo.
Pa nos por alaba Senjor di henter nos curason.
E oracion di Nos Tata, ta un demostracion di unidad, forsa di palabra, Hesus simplemente a sinja su disipelnan y nos tambe, cu nos tur ta Yiu di mesun Tata cu ta Dios Todopoderoso, y cu nos tur mester biba segun Su boluntad, y no segun nos mes boluntad, pa e respet pa Dios keda notabel y visibel den nos bida.Pasobra nos ta den Su reino.
Ora nos ta papia cu nos yiunan, aunke con rabia nos ta, nos tin cu evita di husa e palabra cu ta bisa”Esaki ta mi luga” pasobra hopi hende ta lubida cu e cas cu nan a traha of cumpra, ta di nan yuinan , nan esposa, of esposo tambe, pasobra e ta un Hogar y no un edificio, pasobra harmonia y amor a cambia su nomber, awor e ta pertenece na un Famia.
Cada decision cu nos ta tuma den nos bida,laga nos para keto rato y pensa, si Dios ta di acuerdo cune si of no, pasobra cada decision for di boluntad di Dios, tin su consecuencia, direct,indirect of hasta den e bida cu tin nos dilanti ora nos muri.Pasobra ta nos decision tuma awe ta dicidi na unda nos lo pasa nos bida eterna, den cielo cerca Dios, of den fierno hunto cu diabel,.
E mundo ta ofrece hopi cos, pesey e palabra di Dios ta bisa amistad cu mundo ta enemistad cu Dios, y ta bon pa hende pensa un rato bon:
Samina consenshi,
Consulta cu palabra di Dios,y no laga e deseo di carni y orguyo di bida domina.
No haci cos pa demostra cu nos por.
Pero semper wak cu locual cu nos kier y nos por ta den e boluntad di Dios.
Pasobra mayan cu Dios kier ta nos mes tin cu duna cuenta na Dios, y pakico destina nos bida na sufrimento, si Cristo Hesus a muri pa pordon di nos picanan, pa asina nos por kere den Cristo Hesus y hanja bida eterna.
No duna diabel oportunidad.No laga ningun palabra danino sali for di boso boca,sino solamente palabra cu ta bon pa edificacion, conforme e necesidad di e momento,pa esaki por duna gracia na esnan cu ta tende.No haci e Spirito Santo di Dios tristo,pa medio di kende boso a wordo seya pa e dia di redencion.( Efesionan 4:27-29-30).
No ta solamente cu palabra nos por falta respet pa Dios, pero tambe cu nos actitud, nos por falta respet y keda sin duna reverencia na Dios. Cada biaha cu nos haci algo for di boluntad di Dios, nos ta falta respet pa Dios.Pesey hopi zundramento, pleitamento, violencia den cas, inmoralidad y malicia, semper , lo tin consecuencia pa nos, si nos no arepenti y confesa nos pica, y pidi Dios pa cambia nos bida, entregando nos bida completamente na Cristo Hesus.
Pasobra kico ta bal si nos tin tur cos, y nos alma ta bay perdi?
Sinceramente,Pastor Marcel Balootje
