Durante e conferencia di prensa di fraccion di PPA, Eduard Pieters, miembro activo di PPA, a elabora tocante un mocion presenta pa PPA, unda cu lamentablemente no a haya sosten durante e tratamento di presupuesto di TPEF. E mocion presenta pa PPA tabata tocante inversion necesario pa San Nicolas y comberti e districto aki, specialmente e “mainstreet”, esta e caya principal di San Nicolas como tambe Sero Colorado den un destinacion atractivo y sigur tanto pa nos localnan y e turistanan.
San Nicolas como Capital turistico nobo
Segun Eduard a informa, ta for di campaña caba PPA a inclui e aspecto importante pa fortifica y promove San Nicolas como e Capital turistico nobo, haciendo esaki un “Cultural and Heritage City” di Aruba. Henter e vision aki ta basa riba un plan di desaroyo real y duradero pa San Nicolas y vecindario.
Contenido di mocion
“E mocion presenta pa fraccion di PPA tabata pa urgi gobierno pa uza e fondo di TPEF, pa inverti den iluminacion di “Mainstreet” y asina eleva e calidad di producto di San Nicolas, como tambe inverti den e dos fase di construccion di “Mainstreet”. E momento ideal ta awor pa duna sosten na e museonan na San Nicolas como turistico y pa e turistanan por tin un experencia unico di nos herencia, historia y cultura,” Eduard a enfatisa.
Tambe a urgi gobierno pa inverti den iluminacion den Sero Colorado, pa garantisa e siguridad di e empleado-, habitante- y e turistanan cu ta bishita e area y hotel aki, unda cu tur fraccion a bishita e hotel y conoce e scuridad cu tin eynan.
Mocion di PPA rechasa
“Ta di lamenta cu algun dia atras, por a mira minister di turismo ta bishita y haya henter un recorido di e hotel Secrets na Sero Colorado y sigur por a scucha e mesun peticionnan cu fraccion di PPA a haya di e comunidad. Unda ta boga pa iluminacion, bida y atraccion turistico safe pa San Nicolas. Pero lamentablemente partido AVP y FUTURO a rechasa y vota contra e mocion, cu ta na bienestar general di Aruba, particularmente San Nicolas”, Eduard a elabora.
PPA si a sostene mocion di gobierno
Eduard ta di opinion cu si parlamentario, minister y partidonan kier papia di un politica nobo, ta bon pa pone esaki den practica y accion. Paso notabel tabata cu e coalicion di AVP y FUTURO a trece mocion nr. 2 dilanti, cu ta practicamente mescos cu mocion nr. 1 di PPA y si a haya sosten. Eduard ta aplaudi e accion di Parlamentario di fraccion di PPA, Otmar Oduber, cu a sa di pone pechi di oposicion un banda y vota pro pa e mocion, mustrando realmente kico ta madurez politico, specialmente mirando cu e contenido di e mocion ta practicamente mescos cu esun cu PPA a presenta y nan a rechasa.
