Centro di bario no ta solamente un edificio caminda hende ta reuni. Pa un mucha, e por ta e lugar, caminda e ta haya actividad despues di scol. Pa un adulto mayor, e por ta su punto di contacto cu comunidad. Pa un famia cu ta pasa den dificultad, e por ta e prome lugar, caminda por detecta problema, prome cu e bira un crisis. Y precisamente p’esey parlamentario Eduard Pieters (PPA) ta cuestiona, pakico Aruba ainda ta trata inversion den Centro di Bario como algo secundario.
PPA ta pone inversion social bek riba agenda
Despues di un reunion cu CEDE Aruba y e representantenan di mayoria di Centro di Bario activo, Pieters a sali cu dos realidad: uno positivo y uno preocupante. Segun informacion comparti durante e reunion, tin mas seguridad pa cierto financiamento durante e proximo cinco aña.
Pieters a enfatisa cu: “Si Gobierno a inverti e 5 miyon cu nos a propone den un amienda na 2025, awe Centro di Bario no lo mester bati na porta pa 1,4 miyon, pa nan por sigui funciona y desaroya nan trabou adecuadamente.
Pa Pieters, e situacion aki ta specialmente frustrante, pasobra PPA ya a purba pone mas fondo na disposicion di centro di bario. Esaki a sosode durante tratamento di presupuesto suplementario na 2025, unda fraccion di PPA a presenta un amienda pa destina Afl. 5 miyon pa e centronan di bario. No solamente pa drecha edificio, pero pa inverti den programa, hende y infraestructura social. Pero lamentablemente e propuesta no a haya suficiente sosten.
Prioridad di gobierno
E debate no ta si tin placa, sino kico Gobierno ta considera como prioridad. E argumento cu “no tin placa” no ta suficiente pa Pieters. Pasobra presupuesto nunca ta solamente un documento financiero. “Presupuesto ta pa mustra prioridad politico. Gobierno ta determina unda placa publico ta bay y unda e no ta bay,” Pieters ta expresa.
P’esey, si Aruba ta reconoce problema di soledad, dificultad den famia, mucha cu mester mas sosten, adulto mayor cu mester contacto social y bario cu mester mas cohesion, Pieters ta cuestiona pakico e infrastructura, cu netamente por yuda atende e realidadnan ey, no ta haya inversion necesario.
Centro di bario ta forma parti di e prome linea di prevencion social. Cada florin cu Gobierno no inverti den e area preventivo, por termina ta costa e pais hopi mas, ora e problema bira un crisis.
No hacie un lucha di partido
Pieters tambe kier evita cu e tema mester bira otro pelea entre Gobierno y oposicion.
Si mañan otro partido presenta un bon propuesta pa fortalece Centro di Bario, PPA mester por sostene. “Si algo tin beneficio pa Aruba, nos mester por para banda di dje, sin importa ken a presenta e idea, Pieters ta enfatisa”. Esaki segun Pieters, ta precisamente loke politica mester ta: no proteha credito di un partido, sino bienestar general di pais.
Pasobra finalmente e pregunta no ta si PPA su amienda ta gana of perde. E pregunta ta: “Cuanto Aruba ta dispuesto pa inverti prome cu problema social bira un crisis? Gobierno por bisa cu no tin placa. Pero ora un centro di bario, cu ta sostene comunidad falta Afl. 1,4 miyon, Parlamento tin derecho di puntra: ‘Realmente no tin placa of simplemente no tabata un prioridad?’ Eduard Pieters a conclui.
