Diabierna mainta trempan Master Yoshmar Wever y Master Alberto Klaber di Taekwondo Team Aruba a entrega e Relato di Collect di Januari 2025 te cu Juni 2025 na warda di Polis Oranjestad y despues a entrega un Relato di Collect na Minister di Husticia Drs. Arthur Dowers.
Den e Relato di Collect tin describi tocante di e placa cu a wordo colecta den e prome 6 lunanan di aña y e placa di e rifanan cu e mayornan di atletanan a bende den e prome 6 lunanan. Den e relato tin un amplio splicacion di e gastonan di e biahenan cu e atletanan a realisa pa e aña aki caba hunto cu tur e recibonan. Minister di Husticia Drs. Arthur Dowers a keda hopi sorprendi cu e Relato di Collect y a remarca cu nos ta e unico cu ta entrega Relato di Collect y ta mira e transparencia den Taekwondo Team Aruba. Minister Drs. Arthur Dowers a felicita Master Yoshmar Wever y Master Alberto Klaber pa e bon trabou cu nan ta haci pa nos hobennan.
Esaki ta e transparencia di Taekwondo Team Aruba y ta wordo controla pa Grand Master Melvin Rasmijn cu ta
selecta e atletanan cu ta cla pa biaha. Cada atleta mester bende nan rifa cu ta parti di nan eigen bijdrage y mester
tin un average di mas di 50% di training cu ta wordo controla tur siman.
Master Yoshmar Wever y Master Alberto Klaber ta gradici tur e automobilistanan pa nan contribucion.