Dialuna atardi a surgi un otro drama. Minister di Deporte Gerlien Croes a tuma un decision drastico pa overrule KPA (polis) y pa stop e uzo di Don Elias Mansur Ballpark (Marlboro Ball Park) como luga pa warda autonan confisca pa polis, sin haci investigacion drechi prome. Segun hopi, pa motibo personal. E ta bisa ta pa defende deporte, pero ta parse mas un acto contra deporte, sin conoce e realidad!
Tur cos ta draai rond e anuncio algun ora promer di Cuerpo Policial KPA, cu desde awor e compania RSI a keda encarga pa haci e trabao di towing di autonan confisca pa polis durante control y warda e autonan te ora e doñonan bin busca nan auto.
Metemento directo di Gerlien den KPA y DIP:
Cu e drama cu Gerlien a causa dialuna atardi, ta mustra mas bien un metemento directo den cartera di otro ministernan. El’a duna orden pa saca tur auto pone pafo. Di unda e ta saca e autoridad ey ? Si e uso di tereno ta deporte, e mester canalisa esey via ministerio di Infrastructura cu na su turno ta canalisa esey via DIP. DIP por tuma paso y accion, NO GERLIEN!
“E mandatario di deporte a ordena pa inmediatamente saca tur auto afo y pa uza e luga aki exclusivamente pa loke e ta destina p’e, esta deporte.”
Sin conoce e historia, sin conoce facts, ta tuma decision y ordena, sin consulta e doño di e parke cu ta Carlos Mansur y stichting Don Elias, Gerlien kier drenta cas di hende, y duna ordo!
Esaki ta nada mas cu “temperamento incontrolabel” y actuacion descabeya. Bo no ta ni mantene ni paga e gastonan, pero kier dicta den cas di otro.
Si e destinacion di e tereno ta pa deporte exclusivamente y cu tin decision di minister raad, ni asina Gerlien tin poder pa “duna ordo”! E mester canalisa esaki via e minister encarga cu DIP, Baba Herde, pa start un preceso pa atende cu esaki.
RSI a participa na un destaho y no ta secreto:
E acusacion cu RSI a firma un acuerdo secreto ta FALSO! Den un statement, RSI ta splica cu e proceso a cuminsa na Januari 2024 cu un destaho publico, unda 8 compania a participa. Despues di un evaluacion riguroso, RSI a gana dor cu nan tabata e unico cu por a cumpli cu tur exigencianan di gobierno. E negociacion a dura casi un aña entre KPA, huristanan di gobierno y RSI. No tabata nada di scondi!
RSI NO TA KITA TERENO, PERO A YUDA DEPORTE!
Minister Gerlien por a puntra Cai Cai Williams, ken tin añanan di experiencia den e Bestuur di Marlboro Baseball, pa e conta con e tereno tabata: un mondi abandona prome cu RSI a yega na aña 2020. Ta RSI a haci trabaonan manera:
✅ drecha e tereno (pa muchanan por train)
✅ Paga curnta di luz y awa atrasa (pa e compleho por funciona)
✅ Duna mantenimento (loke gobierno no a haci, pasobra e parke ta di derden)
E autonan confisca ta para riba e tereno, Y NO TA STROBA DEPORTE! Nan no ta riba e cancha i no ta molestia training.
RSI tin añas ta opera den e parke:
RSI ta un compania serio cu ta duna servicio di warda auto confisca pa banco y awo tambe pa polis. E mesun concepto! Si no tin pago, auto ta bai na vindishi.
Awor Gerlien Croes ta mete den polis, poniendo precion tenas riba Arthur Dowers pa para e decision sin busca drechi. E trabao di RSI pa polis no ta un crimen! Un bon gobernante, lo a puntra prome, actua despues. Gerlien ta crea polemica sin motibo, dor di tin un temparament incontrolabel.
Ta un lastima cu Gerlien ta manda reporteronan pa lansa acusacion si busca informacion:
1. Ken y con a firma e contrato?
2. Con e tereno tabata prome? (Abandona, sin mantenimento)
3. Kiko RSI a haci pa deporte? (Inverti pa muchanan por train!)
E conclucion ta cu Gerlien a viola tur principio di gobernacion drechi, mete den tur cartera, y mas decepcion ta cu partido AVP ta na su merced. Nan no por corigi’e ni bise nada. E terminologia “burachi di poder” ta fit precies pa Gerlien.
