Durante e ceremonia oficial pa lansa e Proyecto di Reforestacion di Aruba, Minister di Turismo mr. Wendrick Cicilia a enfatisa e rol vital cu nos naturalesa y biodiversidad ta hunga den e sosten y distincion di Aruba como destinacion turistico. E proyecto tin como meta pa planta 100 mil mata den 4 aña, un paso firme pa conserva y fortifica e identidad natural di Aruba.
“Esaki ta e prome paso pa realisa un vision bunita pa nos pais,” Minister Cicilia a declara. “Aruba su exito turistico ta basa riba loke ta haci nos unico: nos flora, nos fauna, y nos recursonan natural. Nos tin cu preserva esaki, no solamente pa nos mes, pero tambe pa esunnan cu ta bishita nos isla.”
Minister Cicilia a enfatisa cu e vision pa reforesta Aruba ta transcende ministerionan y Ministerio di Turismo ta compromete su sosten structural den e trayecto aki. “Nos ta keda firme na e meta pa preserva loke ta di nos, pa lanta consenshi den nos mes pa despues exigi respet di nos bishitantenan. E balor mester cuminsa na cas mes,” Minister Cicilia a señala.
Minister Cicilia tambe a pone enfoke riba desaroyo urbano cu un accent sostenibel, refiriendo na rotondenan cu ta transforma. “Aki nos tin un rotonde bunita, pero mi deseo ta pa e mesun tipo di desaroyo sosode na Pos Chikito. E bario lo ta sumamente gradici cu un proyecto cu ta combina beyesa y sostenibilidad,” el a agrega.
Minister Cicilia a expresa gratitud pa e grupo di stakeholder, incluyendo organisacionnan turistico manera ATHA y AHATA, cu a uni forsa pa sostene e vision. “Tur encuesta ta mustra: nos bishitantenan ta stima nos naturalesa. E ta un factor primordial di e experiencia Arubano.”
Gabinete AVP-Futuro ta para tras di e proyecto ambicioso aki. “Prome Minister, nos ta cu bo. Stakeholders, nos ta uni. Ban logra esaki hunto,” Minister Cicilia a conclui bisando.
