Diahuebs atardi, Prome Minister mr. Mike Eman, hunto cu Consul di Colombia Sr. Gustavo Serrano Amaya, acompaña pa ehecutivonan di Kustwacht Aruba y di Corsou, a duna un relato na prensa relaciona cu e ultimo desaroyonan rond di e buskeda di e tripulacion di e yate “Energy” cu ta perdi desde diasabra ultimo.
Prome cu e momento cu prensa, a reuni cu e familiarnan di e piscadonan perdi y a duna nan informacion actual di e operacion di rescate. Prome Minister Eman, cu un tono conmovi pa e situacion, tin tur speransa y fe cu e trabao inmenso di rescate lo duna su fruto.
Durante e rueda di prensa, tanto Prome Minister Eman como Consul Amaya, a expresa nan profundo convivencia pa e situacion dificil cu e famianan ta pasando, y a brinda un resumen detaya di tur e esfuersonan cu a haci for di e momento cu e noticia a drenta cu e yate no a yega tera.
For di marduga diadomingo, Wardacosta di Caribe Hulandes a lansa un operacion di buskeda amplio. Un helicopter, un avion y un unidad di Metal Shark a cubri e area riba direccion noordwest-noord di Aruba. Mirando cu e area di buskeda ta keda expande segun dianan ta pasa, a opta pa uza e avion Dash-8 di Kustwacht den un area mucho mas grandi. Cu permiso di autoridad Colombiano, a saca e barco di Marina Real Hulandes Zr.Ms. Friesland y su helicopter pa cubri un area mas grandi parti noord di Colombia. Ademas Ruben Croes, conocido piloto di Search and Rescue tambe a subi lama cu un avion priva pa duna asistencia den e buskeda.
E Consul di Colombia a subraya e compromiso di Colombia pa sigui asisti den e buskeda, y a expresa gran gratitud pa e cooperacion di Aruba, Hulanda y Venezuela. E ultimo tambe a busca den su lama teritorial (Islanan Monjes) cu unidadnan maritimo y aereo.
Mirando cu e area di buskeda a drenta completamente den awa teritorial di Colombia, Wardacosta di Caribe Hulandes a pasa e liderato di e operacion di buskeda npa Wardacosta Colombiano. Ademas Prome Minister Eman ya a tuma contacto via canalnan diplomatico cu autoridad di Panama, pa nan tambe duna un man den e esfuersonan di rescate.
Prome Minister Eman ta haci un yamada na comunidad pa haci oracion y mantene fe y speransa pa por logra haya e piscadonan perdi.
