Durante e ultimo dianan, Aruba a tuma varios paso via canalnan diplomatico pa haya sosten regional den e buskeda pa e cuater piscado Arubano cu ta perdi riba lama. Den presencia di famia, Consul Colombiano na Aruba, Sr. Gustavo Serrano Amaya, y funcionarionan halto di Warda Costa di Reino Hulandes, Premier Mike Eman a tene un conferencia via video cu e comandante di Warda Costa Colombiano y e Forza Marina Nacional di Colombia.
E reunion virtual aki a sigui despues di a traspasa e coordinacion di e buskeda formalmente na e autoridadnan Colombiano, despues cu tabatin indicacion cu e yate Energy por a drif den direccion di awa teritorial Colombiano. Pa duna e traspaso aki mas forma, Aruba mes a tuma e iniciativa pa busca contacto cu e consul Colombiano, cual a resulta den un reunion di nivel mas halto.
“Nos ta convivi cu e famianan, nos isla ta pasando den dianan dificil, pero nos ta sinti nos fortaleci den e solidaridad y profesionalismo di nos rumannan Colombiano,” Premier Eman a bisa durante e videoconferencia.
“E cooperacion aki tin gran balor humanitario pa Aruba.”
Premier Eman tabata acompaña den e reunion pa representantenan di Warda Costa y famia directo di e piscadonan desapareci. Durante e sesion, Prome Minister a expresa su gratitud pa e disposicion di Colombia pa sigui e buskeda bao nan liderato.
For di diasabra, Warda Costa di Reino ta trahando riba un buskeda grandi, haciendo uzo di avion, helikopter, Cutter y boto di patruya. Cu e coordinacion awo den man di Colombia, e area di buskeda a amplia mas den direccion zuid.
Ademas di e contacto cu Colombia, Gobierno di Aruba a tuma contacto tambe cu otro partnernan regional. Durante e conferencia di prensa, Premier Eman a bisa cu a acerca Consulado Mericano na Willemstad y US Coast Guard pa yuda cu e buskeda aki.
Mientrastanto, via un carta formal, a tuma contacto cu e Embahador di Reino na Panama. Den e carta, Premier Eman ta pidi apoyo formal di e autoridadnan di Panama, pa por si acaso e boto Energy drif mas den direccion di awa teritorial di Panama.
Gobierno di Aruba ta sigui dedica completamente pa haña e persona-nan desaparecí y ta mantene contacto diario cu e famianan. Premier Eman ta lansa un apelacion na pueblo Arubano pa union, oracion y solidaridad den e momentu difícil aki.
