Ta deber di tur mayor pa lanta nan yiu den Senjor , cual ta un mandato di Dios,y un bendicion pa e yiu, cual despues ta resulta den un gran gozo pa e mayor.
Mester sinja e hoben pa esforsa su mes den tur locual cu ta bon, pasobra tur locual cu ta bon den bida, tin un preis, nada no ta pornada, palabra di Dios ta bisa: Esforsa bo mes y sea balente.
Flohera no ta hiba ningun hende ni un caminda, alcontrario, e stroba bo bida fisico, mental y spiritual. No tin ningun ganashi of cremento ora hende ta floho.
Palabra di Dios ta bisa nos den Santiago 1:5-6 cual ta algo cu tur mayor mester bisa nan yiu, pasobra ta para scirbi:
Ma si cualkier di boso falta sabiduria, lage pidi Dios, Kende ta duna na tur hende generosamente y sin reproche. Ma lage pidi den fe , sin ningun duda, pasobra esun cu duda, ta manera ola di laman, cu ta wordo lastra y tira door di biento.
Laga e hoben no hinca den su cabes cu otro hende ta strobe di studia, conociendo e berdad, cu si e mester di sabiduria, of e no ta compronde un les, e tin pidi Dios sabiduria pa e logra su meta.
Pasobra awendia mayornan ta zorg pa nan yiu tin tur cos y conoce tur locual ta material, pero nan ta lubida e parti di mas importante cu tur hoben mester , cual ta cu nan mester tin un relacion intimo cu Dios.
Pablo a bisa Timoteo mas cu un biaha,cuminsando den 1 Timoteo 4:12: No laga ningun hende menosprecia bo hubentud, ma mas bien den Palabra. Conducta . Amor , Fe y Puresa, demostra bo mes di ta un ehempel pa esnan cu ta kere.
Y den 2 Timoteo 3:10 Pablo ta bolbe avisa Timoteo bisando: Ma abo a sigi mi sinjansa, conducta, proposito, Fe Pasenshi,Amor,Perserverancia.
Ta mesun conseho cu Pablo ta duna na Timoteo, nos como mayor mester por duna na nos yuinan, pasobra nos bida mester ta un testimonio bibo na Dios, pa asina nos yuinan por sinja for di dje.
David tambe a duna Salomon conseho den 1 Cronicanan 28:9 bisando: Ma pa loke ta abo, mi yiu Salomon, conoce e Dios di bo tata , y sirbi E cu henter bo curason y cu un alma boluntario, pasobra Senjor ta scrudinja tur curason y ta compronde tur intencion di e pensamentonan, si bo busce E lo laga bo hanja E,ma si bo bandon’E, E lo rechasa bo pa semper.
Den tur esaki nos por mira e bon experiencia cu un tata tin cu Dios, y con e ta pase over pa su yiu.
Curason di hende prudente ta adkiri conocemento y horea di hende sabi ta busca conocemento.(Proverbionan 18:15).
Scucha conseho y acepta disiplina, pa bo por ta sabi pa resto di bo bida.(Proverbionan 19:20).
Esun cu cana den rectitud lo cana confiadamente,ma esun cu perverti su camindanan lo wordo descubri.( Proverbionan 10:9).
Of boso no sa cu boso curpa ta tempel di Spirito Santo, kende ta den boso,Kende boso tin como Dios, y cu boso no ta pertenece na boso mes. Pasobra boso a wordo cumpra pa un preis, pesey glorifica Dios den boso curpa.( 1 Corintionan 6:19-20).
E enemigo ta busca tur manera di rebaha nos hubentud, cu droga, inmoralidad,alcohol, cu tattoos rond nan curpa, manera e curpa ta di nan, y pa falta di conocemento hopi hoben ta cay den e trampa.
Pesey ta necesario pa nos tur haci oracion constantemente pa tur nos hobennan.
Sinceramente, Pastor Marcel Balootje
