Algun comerciante tabata hostina cu Gobierno a logra haya otro prestamo…… A tilda Gobierno cu a tuma e decision den beneficio propio y cu desde diahuebs anochi lo perde tur respet pa Promer Minister di Aruba…
Ta di lamenta cu hopi kier opina y critica, sin conoce e materia y su implicacion..
Diahuebs anochi, Prome Minister di Aruba, Sra. Wever Croes a haci anuncio cu su Gobierno a keda cla cu un financiador pa asina presta Gobierno placa. Esaki ta haci cu Gobierno lo tin mas tempo pa sigui negocia cu Hulanda, pasobra manera cu e condicionnan di Hulanda ta actual, ta algo cu nos no por guli. No unicamente Hulanda ta bini cu condicionnan draconico, pero tur dialuna nan ta cambia condicion. Pues Hulanda no ta tene su mes na palabracion.
E ultimo impase ta cu Hulanda di “no-where” a informa e siman aki, cu e prestamo di 204 miyon ta pa cubri e gastonan di likides di Aruba di >> 1 di juli pa 30 di November 2020.<< Esaki ta totalmente otro di loke CFT mes a aproba, unda e prestamo di 204 miyon ta pa cubri 3 luna y no 5 luna.
Scenario a cambia:
Na prome instante, institucionnan bancario o di inversion no tabata considera di duna mas prestamo na Aruba. Sinembargo e panorama a cambia y awor tin institucionnan cu ta intresa pa por otorga Gobierno e prestamo. Esaki ta haci cu Hulanda no ta e unico opcion mas, manera tabata e caso. Pesey mes a dicidi pa accepta e prestamo cual ta duna Aruba placa pa dos luna, mientras lo sigui negocia cu Hulanda y busca forma pa convence e politiconan terko na Hulanda, cu e producto di solucion mester ta un consensus real y no uno cu pistol na cabes.
Comerciantenan hostina:
Un rato despues di e discurso nacional, por observa un rabiamento formal riba rednan social, unda un handje vol di comerciantenan a saca nan gal riba Prome Minister, papiando cosnan insolito, zundrando, y tabata spart nan odio y instigacion. Riba e pagina di conocido comercainte tabatin “jump up”. Hopi zundramento contra gobierno. A tilda gobierno cu a tuma e decision aki den beneficio propio y despues a pone cu “desde awe lo perde tur respet pa Promer Minister”.
Hopi comerciante no tabata ni na altura di e ultimo cambio di Hulanda, esta e 204 miyon pa 5 luna enbes di 3 luna. Pues, defacto, ta keda un buraco, cual di tur manera lo mester wordo financia door di otro institucion.
Ora bo puntra e mes un grupito aki, si nan conoce e contenido di e landspakket, nan ta contesta cu nan no sa. E unico cos cu nan sa ta cu e prestamo ta na 0%. Pues, kier firma pa loco, sin sa kico e implicacion ta. Nos ta kere cu esey no ta algo responsabel y ta spera si mas seriedad y cu cada un di e comerciantenan aki cu ta perde sinti riba facebook, bira onbeschoft contra un Promer Minister hende muher, pa nan bay lesa tur e aspectonan y djey forma nan opinion. De lo contrario nan no ta siribi interes di Aruba.
E cancion a cambia: di “firma pa caba” pa “Fo’I ken a fia” ?
Ta logico cu e decision di Prome Minsiter a sorpresa tur hende. Nunca nan a spera cu lo por a Sali di e precion Hulandes. Nan tabata manera poco cayman na boca di riu ta warda pa wak e firmamento. Ora a decepcionan, nan a cambia e grito: For di ken a fia? No tin duda cu Gobierno lo anuncia na su debido tempo ta for di ken a fia. Pues, no mester ansha curpa, pero duna Gobierno e tempo y na su debido momento lo informa.
