Un caluroso saludo pa tur nos dushi hendenan cu ta lesa nos relato tur siman fielmente y cu un danki diki gordo na tur cu ta dunami bon comentario. Awe nos ta relata un crenchi di e interesante atardi den Biblioteca cu e actividad Dia internacional di e pueblonan indigena proclama pa Unesco. Esaki a tuma lugar diasabra dia 9 di augustus ultimo cu e tremendo charla “Lenga indigena tradicion y supervivencia” duna pa Mag.Ling. Ramon Todd Dandare. Un exitoso actividad organisa pa Fundacion Rancho, BNA y Fundacion Lanta Papiamento flp. Tawata reina un dushi ambiente cu pregunta y contesta entre e publico y e orador Ramon Todd.
Por a scucha e.o. cu algun di e pueblonan indigena cu ta perdiendo nan lenga materno y otronan cu ta trahando pa tene esaki bibo den nan tribonan. Lenganan indigena cu ta wordo studia na varios universidad rond mundo. Y cu tin varios lugar na mundo cu ta papia un crenchi manera nos, no excactamente, pero cu un secuencia diferente y cu palabranan parecido na nos papiamento. Bo tawata sa, cu na e lenga di “wayunaiki” e palabranan “mi ta stima’bo” ta “arakatay punay”? Esey nos a tende foi den publico presente, for di un cabayero cu nos no ta corda su nomber. Si ta asina di berdad nos no sa. Por ta e tawata un joke ? Pero ora bo subi google app ofzo, bo ta hanja otro palabranan cu tin puntje puntje riba nan cu Lady Ruth no por reproduci via su laptop pone den e relato. Nos a topa cu Jufr. Marlien y Jufr. Shirley. Shirley ta e vice presidente y tesorero di e fundacion “Pnhsa” cu ta plataforma nacional herencia di sclavitud Aruba y Marlien ta e secretaria.
E interesante charla di Ramon ,e tawata Master den e materia, ela busca su informacionnan bon, e cu Joyce Pereira, Ramon a duna e magnifico presentacion profesional y di curason di su charla “Lenga indigena tradicion y supervivencia”. Despues di e charla Lady Ruth a invita su casa Johan pa bay bayla un crenchi den Bucuti Yacht club cu e dushi musica di The Fantastics cu ta toca hopi dushi musica oldies cu ta faborito di Lady Ruth. E cancionnan inolvidabel di mas bunita di anjanan 60, 70. Lady Ruth a bayla bay gol den grupito cu bunita amiganan manera Mary, Ella y Suhaila. Johan cu mi a saborea croquette di calco y un potje ceviche masha dushi mes, bebiendo nos gingerale cu smak. Naaaaaaaaah, Lady Ruth no tin mester di alcohol pa ta super jolly , ta su curason ilumina ta guia.
Tawata un dushi y bunita weekend atrobe, cu ta pone nos realisa, cu tempo no tin paracion pa ningun hende, cana e ta sigui cana bay. Nos ta felicita Djiespies Place, e famia Franken cu nan 10 anja di alegria pa y cu pueblo, desde e comienzo cu e fayecido musico talentoso cu curason grandi Etty Toppenberg y su amigonan. Danki na famia Franken y Djiespies Place, tin algo dushi di hasi tur diabierna anochi, los e heupnan y pianan un crenchi baylando un dushi pieza toca pa Robert Thiel y su grupo, Robert Maduro y su grupo Azucar, grupo Nos cu Nos cu e.o. Hubert Ras y Antonieta Ras-Booi y un of dos grupo mas cu nos no conose ainda. Pasa un dushi dia yen di sabiduria den nos alegria ! Un bon siman colma di salud y mas sabiduria ! Un “bearhug” pa boso nan tur !!! Saludos di Ruthy “Lady Ruth”.
